პირველი მარტიდან გადამფრენ ფრინველებზე ნადირობა აკრძალულია.
ამიტომ, გარემოს დაცვისა და ზედამხედველობის დეპარტამენტი მონადირეებს მოუწოდებს მკაცრად დაიცვან დაწესებეული ვადები. წინააღმდეგ შემთხვევაში, კანონის თანახმად, „რიგ შემთხვევაში, მოხდება მოპოვებული ობიექტებისა და სანადირო იარაღის კონფისკაცია და ასევე, შესაძლოა, პირს ჩამოერთვას სანადირო ცეცხლსასროლი იარაღის ტარების უფლებაც.
ფრინველის უკანონოდ მოპოვების შემთხვევაში, საჯარიმო თანხას ემატება გარემოსთვის მიყენებული ზიანის თანხაც.
თუ მოპოვებული ნანადირევით გარემოს მნიშვნელოვანი ზიანი მიადგა, პირის მიმართ სისხლის სამართლის პასუხისმგებლობის საკითხი განიხილება“-ამბობს გარემოს დაცვის და ზედამხედველობის დეპარტამენტი.
მათივე ინფორმაციით, სეზონის განმავლობაში, 685 სამართალდარღვევა გამოვლინდა.
აქედან, ყველაზე მეტი – 228 ფაქტი დაფიქსირდა იმერეთში, 117- სამეგრელო-ზემო სვანეთში.
მცხეთა-მთანეთში – 95, კახეთში – 74, შიდა ქართლში – 46, გურიაში – 45, ქვემო ქართლში – 23, აჭარაშიც – 23, სამცხე-ჯავახეთში – 17, რაჭა-ლეჩხუმი ქვემო სვანეთში კი – 7.
უკანონო ნადირობის 10 ფაქტი გამოვლინდა თბილისშიც.
სამართალდარღვევებიდან 4 ფაქტი სისხლის სამართლის დანაშაულის ნიშნებს შეიცავს და მასალები, შემდგომი რეაგირების მიზნით, შესაბამის უწყებებში გადაიგზავნა.
