დღეს, 14 ივლისს, ბათუმი-ხელვაჩაურის გზაზე სამარშრუტო ტაქსის მძღოლი, 42-43 წლის მამაკაცი გარდაიცვალა.
როგორც თვითმხილველები ყვებიან, მძღოლი შეუძლოდ გახდა, მანქანა გააჩერა [მახვილაურის გადასახვევთან] და ძირს ჩავიდა. მგზავრებმა სასწრაფო სამედიცინო დახმარება გამოიძახეს, მაგრამ ადგილზე მისულ ბრიგადას მძღოლი გარდაცვლილი დახვდა. თვითმხილველების თქმით, გზაზე, მაშინ როცა მძღოლი ჯერ კიდევ ცოცხალი იყო, სხვა სასწარაფო სამედიცინო დახმარების მანქანამ ჩამოიარა, მოქალაქეებმა მისი გაჩერება სცადეს, თუმცა აღნიშნულმა ბრიგადამ მძღოლს იმ მიზეზით არ გაუწია დახმარება, რომ სხვა გამოძახებაზე მიდიოდა.
ბათუმის სასწრაფო სამედიცინო სამსახურში ადასტურებენ, რომ გამოძახებული ბრიგადის მისვლამდე, შემთხვევის ადგილზე სხვა ბრიგადამ ჩაიარა:
„სასწრაფოს ბრიგადა ამ გამოძახებაზე გამოსული იყო ქალაქ ბათუმიდან. ამ გზაზე მეორე სასწრაფო დახმარების ბრიგადა მიდიოდა სოფელ სატეხიაში, მშობიარესთან, რომელსაც სანაყოფე წყლები დაღვრილი ჰქონდა და რა თქმა უნდა გარბოდნენ. შემდეგ ოპერატორმა რაციით გამოიძახა თავისუფალი და უახლოესი ბრიგადა, რომელიც იყო სწორედ ეს ქალაქიდან გასული ბრიგადა. მივიდა ზუსტად ექვს წუთში გამოძახებიდან, მაგრამ სამწუხაროდ სამარშრუტო ტაქსის მძღოლი გარდაცვლილი დახვდათ“, – განაცხადეს ბათუმის სასწრაფო სამედიცინო დახმარების ცენტრში. მათივე თქმით, გარდაცვალების მიზეზი ჯერ-ჯერობით დადგენილი არ არის.
„ბათუმელებს“ სასწრაფო სამედიცინო სამსახურში ისიც უთხრეს, რომ გამოძახებაზე გასულმა ბრიგადამ, რომელიც გზად რაიმე უბედურ შემთხვევას ან ავარიას შეხვდება, უნდა გააჩეროს და დახმარება გაუწიოს საჭიროების მქონე პირებს. ხოლო თავისი გამოძახება გადასცეს სხვა ბრიგადას: „თუმცა, შესაძლებელია, შეუმჩნეველი დარჩეს ექიმისთვის და მძღოლისთვის ქუჩაში პიროვნების ცუდად გახდომის ფაქტი, რის გამოც არ გაუჩეროს მანქანა“.
შსს პრესსამსახურის ინფორმაციით საქმე აღძრულია სისხლის სამართლის 115-ე მუხლით, რაც გულისხმობს თვითმკვლელობამდე ან თვითმკვლელობის ცდამდე მიყვანას მსხვერპლისადმი მუქარით ან სასტიკი მოპყრობით ანდა მისი პატივის ან ღირსების სისტემატური დამცირებით.
