მთავარი,სიახლეები

მეგი გოგიტიძე ქობულეთელია და ამიტომ ვამღერებთ – ქობულეთის მერია

22.12.2023 •
მეგი გოგიტიძე ქობულეთელია და ამიტომ ვამღერებთ – ქობულეთის მერია

საახალწლო კონცერტებისთვის ქობულეთის მერიას ბიუჯეტიდან 50 ათასი ლარი აქვს გამოყოფილი. კონცერტებში როგორც ადგილობრივი, ასევე მოწვეული მომღერლები მიიღებენ მონაწილეობას.

მათ შორისაა მომღერალი მეგი გოგიტიძეც, რომელიც საქართველოს ტერიტორიების ოკუპაციის მიუხედავად, მაინც მართავს მოსკოვსა და რუსეთის სხვა ქალაქებში კონცერტებს.

მეგი გოგიტიძეს რუსეთში კონცერტების გამართვაზე არც მაშინ უთქვამს უარი, როცა რუსეთი უკრაინაში შეიჭრა და ფართომასშტაბიანი ომი დაიწყო.

გოგიტიძის რუსული ვოიაჟების გამო მიმდინარე წლის ზაფხულში კონცერტი გააუქმა, მაგალითად, ბათუმურმა კლუბმა  Sector-მა. თუმცა ქობულეთის მერია გოგიტიძეს ყოველწლიურად უხდის ბიუჯეტიდან ფულს და არც გოგიტიძის რუსეთში გამართული კონცერტების გამო გრძნობენ უხერხულობას.

„მეგი გოგიტიძე ქობულეთელია და ყოველთვის ვიყენებთ. შარშანაც გვყავდა“, – ამბობს „ბათუმელებთან“ ქობულეთის მერიის კულტურის განყოფილების ხელმძღვანელი ნათია ნიჟარაძე.

მას ვკითხეთ, თუ რას ფიქრობს მეგის მიერ რუსეთში გამართულ კონცერტებზე. ნიჟარაძემ გვიპასუხა, რომ ეს კითხვები თავად მეგის უნდა დავუსვათ.

„მეგი არის ჩვენი მომღერალი, ქობულეთელია და შესაბამისად, ყოველწლიურად ქობულეთში ჩვენ მეგისთან გვაქვს აი ასეთი… ჰყავს თავისი მსმენელი, ბავშვები, რომლებიც მოდიან და მოსწონთ“, – აგვიხსნა ნათია ნიჟარაძემ.

როგორც მერიაში გვითხრეს, საახალწლო კონცერტების ორგანიზებას შპს „სივრცე“ უზრუნველყოფს, ამიტომ რამდენს გადაუხდიან გოგიტიძეს ბიუჯეტიდან სიმღერაში, მერიაში არ გვიპასუხეს. „მთლიანი ბიუჯეტი 50 ათასია და ვის რამდენს გადაუხდიან, ამას ალბათ კომპანია გადაწყვეტს“, – თქვეს მერიაში.

საახალწლო ღონისძიებებზე მთლიანობაში ქობულეთის მერია 250 ათას ლარს დახარჯავს.

გადაბეჭდვის წესი


ასევე: