4 დეკემბრის დილას აზიურ ბაზრებზე ოქროს ფასმა ახალი რეკორდი დაამყარა – 2135 დოლარი ტროას უნციისთვის [31,1 გრამი], წერს „დოიჩე ველე“.
სააგენტო „ფრანს პრესის“ ცნობით, ფასები იზრდება იმ მოლოდინის ფონზე, რომ აშშ-ის ფედერალური სარეზერვო სისტემა შეამცირებს საპროცენტო განაკვეთს კომერციული ბანკებისთვის, თუმცა გასულ კვირას ფედერალური რეზერვის თავმჯდომარემ, ჯერომ პაეულმა თქვა, რომ უწყება არსებულ დონეზე [5,5%] შეინარჩუნებდა განაკვეთს.
ფასის ზრდა ასევე დაკავშირებულია დოლარის კურსის ვარდნასთან. ამასთან ერთად, გამოცემა აღნიშნავს, რომ ოქრო, ისრაელ-ჰამასის ომის ფონზე, განიხილება როგორც სანდო აქტივი.
ოქროს ფასი უკვე რამდენიმე კვირაა მატულობს. „ბლუმბერგის“ მონაცემებით, ოქტომბრის დასაწყისიდან დაფიქსირდა 16%-იანი ზრდა. ბოლოს ოქროს ფასის ყველაზე მაღალი მაჩვენებელი იყო 2080 დოლარი, 2020-ის აგვისტოში.