იტალიაში დასრულდა ქვეყანაში ბოლო 30 წლის განმავლობაში ყველაზე დიდი სასამართლო პროცესი, რომელზეც კალაბრიულ მაფიასთან დაკავშირებული პირები გაასამართლეს.
20 ნოემბერს იტალიის სასამართლომ სხვადასხვა ვადით პატიმრობა მიუსაჯა 200-ზე მეტ ადამიანს, რომლებიც დაკავშირებულნი იყვნენ მაფიოზურ ჯგუფ „ნდრანგეტასთან”.
მედიის ცნობით, საერთო ჯამში, დაკავებული იყო 338 ადამიანი, რომლებსაც ბრალი ედებოდათ 400-ზე მეტ დანაშაულში, მათ შორის: ნარკოტიკებითა და იარაღით ვაჭრობაში, გამოძალვასა და მაფიასთან კავშირში. პროკურორებმა 322 ბრალდებულისთვის ჯამში თითქმის 5000 წლით თავისუფლების აღკვეთა მოითხოვეს. საქმეში ჩართული იყო 900 მოწმე და 400 ადვოკატი.
სასამართლომ 131 ბრალდებული გაამართლა და 207-ს ჯამში 2000-ზე მეტი წლით თავისუფლების აღკვეთა მიუსაჯა. სასამართლო პროცესი 3 წლის განმავლობაში მიმდინარეობდა.
ყველაზე მკაცრი სასჯელი მიესაჯა „ნდრანგეტას“ ორ წევრს – სავერიო რატიონალეს და დომენიკო ბონავოტეს – 30-30 წელი. მსჯავრდებულთა შორის იყო ასევე ყოფილი დეპუტატი ჯანკარლო პიტელი, რომელსაც 11 წლით თავისუფლების აღკვეთა მიესაჯა.
„ბიბისი“ წერს, რომ ამ სასამართლო პროცესზე ბრალდებულთა სიაში არ მოხვდა მაფიოზური ჯგუფის ლიდერი, ლუიჯი მანკუზო, რადგან მისთვის ცალკე სასამართლო პროცესია მომზადებული. მისი ძმისშვილი, ემანუელე მანკუზო, საქმეში მთავარი მოწმე იყო, მან გაამხილა კლანის საიდუმლოებები მას შემდეგ, რაც პოლიციისგან მაღალი დონის დაცვის გარანტია მიიღო.
მედიის ცნობით, „ნდრანგეტა“ ითვლება ერთ-ერთ ყველაზე გავლენიან მაფიოზურ დაჯგუფებად იტალიაში, წელიწადში მრავალმილიარდიანი ბრუნვით. ამ ჯგუფს უკავშირდება კოკაინის იმპორტი ევროპაში.
