2023 წლის მესამე კვარტალში საქართველოში 2.7 მილიონი არარეზიდენტი საერთაშორისო მოგზაური შემოვიდა, რაც 19.4 პროცენტით მეტია წინა წლის ანალოგიური პერიოდის მაჩვენებელზე.
ტურისტთა უდიდესი ნაწილი, 42.5 პროცენტი, 31-50 ასაკის მოგზაური იყო.
„აღნიშნული რაოდენობიდან საერთაშორისო ვიზიტორების მიერ განხორციელებული ვიზიტების რაოდენობამ 2.3 მილიონი შეადგინა, რაც 21.0 პროცენტით მეტია 2022 წლის ანალოგიური პერიოდის მაჩვენებელზე,“ – ნათქვამია საქსტატის მიერ გავრცელებულ დოკუმენტში.
საქსტატის განმარტების თანახმად, ვიზიტორი არის 15 წლის ან უფროსი ასაკის საქართველოს არარეზიდენტი მოგზაური, რომელმაც განახორციელა ვიზიტი საკუთარი ჩვეული გარემოდან საქართველოს ტერიტორიაზე ერთ წელზე ნაკლები დროით.
საქსტატის მონაცემებით, 2023 წლის მესამე კვარტალში ვიზიტორების ყველაზე დიდი რაოდენობა, 571.4 ათასი, დაფიქსირდა რუსეთის ფედერაციიდან, რაც ვიზიტორების ჯამური რაოდენობის 24.4 პროცენტს შეადგენს. მეორე ადგილზეა თურქეთი (498.9 ათასი) 21.3%-იანი წილით, ხოლო მესამეზე – სომხეთი (339.0 ათასი) 12.9%-იანი წილით.
საქსტატის ინფორმაციით, 2023 წლის მესამე კვარტალში საქართველოში ვიზიტისას ვიზიტორებმა 4.8 მილიარდი ლარის ხარჯი გაწიეს, რაც 7.3 პროცენტით მეტია წინა წლის ანალოგიური პერიოდის მაჩვენებელზე.
ვიზიტზე საშუალო ხარჯი 2022 წლის მესამე კვარტალთან შედარებით 11.3 პროცენტით შემცირდა და 2 105.8 ლარი შეადგინა.
