„სტაბილურად მძიმეა, რჩება რეანიმაციის დეპარტამენტში, კონტაქტურია,“ – გვითხრეს ბათუმის სამედიცინო ცენტრის პრესცენტრში ავარიის შედეგად დაშავებული კაცის ჯანმრთელობის მდგომარეობაზე.
ავარია ბათუმში, აეროპორტის გზატკეცილზე, გუშინ, 8 ნოემბერს, მოხდა. ორი დაშავებული ბათუმის სამედიცინო ცენტრში გადაიყვანეს, ერთ-ერთი გუშინ გარდაიცვალა.
დაღუპული ახალგაზრდა გარემოსდაცვითი ზედამხედველობის დეპარტამენტის თანამშრომელი იყო. ამავე დეპარტამენტის თანამშრომელია დაშავებულიც. „ისინი სამსახურებრივ მოვალეობას ასრულებდნენ“, – გვითხრეს დეპარტამენტში.
შინაგან საქმეთა სამინისტროს ინფორმაციით, ფაქტზე დაწყებულია გამოძიება.