ბათუმის მუნიციპალურ ავტობუსებში „საქართველოს ბანკისა“ და სპეციალური პლასტიკური ბარათების გარდა მგზავრობის საფასურის გადახდა უკვე „თიბისი“ ბანკის ნებისმიერი ბარათითაა შესაძლებელი.
„დაემატა „თიბისი“, არის „საქართველოს ბანკი“ და საერთაშორისო ბანკებიც. აქედან გამომდინარე შეგვიძლია ვთქვათ, რომ მოქალაქეების 90 პროცენტს უკვე შესაძლებლობა აქვს მგზავრობის საფასური პირადი ბარათით გადაიხადოს.
„ლიბერთი ბანკს“ რაც შეეხება, ვისაც ამ ბანკის ბარათები აქვს, ისინი ჩვენთან ისედაც ფასდაკლების ბარათებით სარგებლობენ – პედაგოგები, პენსიონერები, მოსწავლეები და სხვა. შეიძლება ჩავთვალოთ, რომ ჩვენი შეღავათიანი გადახდის ბარათები „ლიბერთის“ ფუნქციასაც ასრულებს – რადგან ამ ბანკის კლიენტების 95 პროცენტი ჩვენი ბარათებით სარგებლობს.
სხვა ბანკების, ასე ვთქვათ, წილი ბაზარზე დაბალია, მაგრამ ეტაპობრივად მათი დამატებაც იგეგმება“ – გვითხრეს „ბათუმის ავტოტრანსპორტში“
ბათუმის მუნიციპალურ ტრანსპორტში მგზავრობის საფასურის ნებისმიერი ბანკის ბარათით გადახდა 2023 წლის იანვრიდან იგეგმებოდა, ეს პროცესი დროში გაიწელა, თუმცა მთლიანად შეიცვალა ავტობუსებში გადახდის აპარატები.
გადახდის ახალი სისტემის პარალელურად ძალაში დარჩა საქალაქო ავტობუსებით შეღავათიანი თუ უფასოდ მგზავრობის არსებული წესი. შესაბამისად, მოქმედებს ასეთი მგზავრობისთვის განკუთვნილი სპეციალური პლასტიკური ბარათები.
ბათუმში უბილეთოდ მგზავრობისთვის ჯარიმა 20 ლარია. ავტობუსებში მგზავრობის საფასურის გადახდას ბათუმის მერიის მუნიციპალური ინსპექციის თანამშრომლები აკონტროლებენ.
შემოწმების პროცესში ავტობუსს გადაადგილება ეკრძალება, რაც ხშირ შემთხვევაში მგზავრთა უკმაყოფილებას იწვევს.
ამავე თემაზე:
https://batumelebi.netgazeti.ge/news/462423/
///////////////////////////////////////////////////////////////////////////////////////////////////
https://batumelebi.netgazeti.ge/news/483467/
