„ბათუმის ავტოტრანსპორტში“ აცხადებდნენ, რომ მუნიციპალურ ავტობუსებში ნებისმიერი ბანკის ბარათით გადახდა იანვრის დასაწყისში იქნებოდა შესაძლებელი; შემდეგ იანვრის ბოლო დასახელდა, თუმცა, ჯერჯერობით, როგორც კომპანიაში განაცხადეს, ბათუმის მუნიციპალურ ტრანსპორტში მხოლოდ საერთაშორისო ტიპის საბანკო ბარათებით გადახდის სერვისი დაემატა.
როდის დაიწყება სხვა, ადგილობრივი ნებისმიერი ბანკის ბარათით მგზავრობის საფასურის გადახდა, ამ ეტაპზე კვლავ უცნობია.
„მუნიციპალურ ავტობუსებში გადახდის ახალი სისტემის დანერგვა ხორციელდება 2 ეტაპად: პირველი ეტაპი გულისხმობდა ავტობუსებში გადახდის ახალი აპარატების დამონტაჟებას, რაც უკვე დასრულდა.
რაც შეეხება მეორე ეტაპს, გასულ კვირას სისტემაში უკვე ჩაერთო საერთაშორისო ტიპის ყველა საბანკო ბარათი“ – მოგვწერეს დღეს, 30 იანვარს „ბათუმის ავტოტრანსპორტიდან“.
უცხოური ბანკების ბარათებით გადახდისას, მგზავრს ბარათზე, მგზავრობის საფასურის – 30-ის ნაცვლად, 80 თეთრი ჩამოეჭრება.
„ადგილობრივი, სხვა საბანკო ბარათების სისტემაში ინტეგრაციასთან დაკავშირებულ მოლაპარაკებებს ახორციელებს „საქართველოს ბანკი“. შესაბამისი პროცედურების დასრულების შემდეგ, რაც უმოკლეს ვადებში უნდა მოხდეს, ის უზრუნველყოფს ამ ბარათების ჩართვას გადახდის სისტემაში, რის შემდეგაც მგზავრობის საფასურის გადახდა სხვა საბანკო ბარათითაც გახდება შესაძლებელი.“ – მოგვწერეს „ბათუმის ავტოტრანსპორტიდან“.
„ბათუმელები“ დაუკავშირდა „საქართველოს ბანკსაც“, სადაც გვითხრეს, რომ აღნიშნულ საკითხზე სხვადასხვა ბანკთან მოლაპარაკებების პროცესის დასრულებამდე, კონკრეტული ინფორმაციის მოწოდებას მიზანშეწონილად არ მიიჩნევენ.
___________________________
ბათუმში გადახდის ახალი სისტემის სრულად ამოქმედების შემდეგ ძალაში დარჩება საქალაქო ავტობუსებით შეღავათიანი თუ უფასოდ მგზავრობის ის წესი, რაც დღეს მოქმედებს, შესაბამისად, იმოქმედებს ასეთი მგზავრობისთვის განკუთვნილი სპეციალური პლასტიკური ბარათებიც.
ამავე თემაზე:
https://batumelebi.netgazeti.ge/news/458735/
