მთავარი,სიახლეები

რუსეთი იყენებს ყოფილ პატიმრებს „ელიტურ“ დანაყოფში – ბრიტანეთის დაზვერვა

24.10.2023 • 565
რუსეთი იყენებს ყოფილ პატიმრებს „ელიტურ“ დანაყოფში – ბრიტანეთის დაზვერვა

დიდი ბრიტანეთის თავდაცვის სამინისტროს დაზვერვის სამსახური დღეს, 24 ოქტომბერს, X-ზე [ყოფილი ტვიტერი] აქვეყნებს ცნობებს იმის შესახებ, თუ როგორ იყენებს რუსეთი ქვედანაყოფ Shtorm –Z-ს რუსეთ-უკრაინის ომში.

დაზვერვის სამსახური აცხადებს, რომ Shtorm –Z პირველად 2022 წელს გამოჩნდა და მას შემდეგ რუსეთი აქტიურად იყენებს უკრაინაში ადგილობრივი შეტევისთვის.

„არსებობს რეალური ვარაუდი, რომ რუსეთი Shtorm –Z-ს თავდაპირველად იყენებდა, როგორც ელიტურ ორგანიზაციას, რომელსაც ტაქტიკური ინიციატივის ხელში ჩაგდება შეეძლო“ – წერს ბრიტანეთის დაზვერვა.

უწყების ცნობით, 2023 წლის გაზაფხულიდან Shtorm –Z ფაქტობრივად იქცა დანაყოფად, რომელიც მსჯავრდებულებით და რეგულარული ჯარის იმ მებრძოლებითაა დაკომპლექტებული, რომლებსაც დისციპლინური გადაცდენა აქვთ.

დიდი ბრიტანეთის დაზვერვის სამსახურის შეფასებით, მონაცემების თანახმად, მიუხედავად იმისა, რომ Shtorm –Z გამოიყენება ფრონტზე შეტევებისთვის, მათ ლოჯისტიკურ თუ სამედიცინო დახმარებას ნაკლები ყურადღება ექცევა.

Shtorm-Z-ის არსებობა ხაზს უსვამს რუსეთში ქვეითების მომზადების სირთულეს – მიიჩნევს ბრიტანეთის დაზვერვა.

Shtorm-Z-ის შესახებ საგამოძიებო მასალა „როიტერსმა“ 3 ოქტომბერს გამოაქვეყნა. გამოძიების თანახმად, Storm Z-ის რაზმები ძირითადად ყოფილი პატიმრებისგან შედგება, მაგრამ აქ ასევე ხვდება სამხედრო პერსონალი, რომლებიც ალკოჰოლის ან ნარკოტიკების მიღებისას დაიჭირეს, ან რომლებიც უარს ამბობენ ბრძანებების შესრულებაზე. „თუ კომენდანტები დაიჭერენ ვინმეს, ვისაც ალკოჰოლის სუნი ასდის, მაშინვე იქ აგზავნიან“, – უთხრა ჟურნალისტებს რუსმა ოფიცერმა.

______________

ავტორი: ანა ბაჟუნაიშვილი 

გადაბეჭდვის წესი


ასევე: