დიდი ბრიტანეთის თავდაცვის სამინისტროს დაზვერვის სამსახური დღეს, 9 ოქტომბერს, რუსეთსა და ირანს შორის ურთიერთობაზე წერს.
ბრიტანეთის დაზვერვის შეფასებით, ბოლო წლებში რუსეთის პარტნიორობა ირანთან გაძლიერდა და დაჩქარდა რუსეთის უკრაინაში შეჭრით.
„საერთაშორისო იზოლაციამ აიძულა რუსეთი გადაეტანა თავისი საგარეო პოლიტიკური ძალისხმევა ადრე ნაკლებად სასურველი პარტნიორობისკენ დიპლომატიური, ეკონომიკური და სამხედრო მხარდაჭერის მოსაპოვებლად“ – წერს ბრიტანეთის დაზვერვა.
ანალიტიკოსები წერენ, რომ რუსეთისთვის განკუთვნილი ირანის სამხედრო დახმარება უკრაინასთან ომში მოიცავდა ასობით დრონსა და საარტილერიო საბრძოლო მასალებს. „ირანის უპილოტო საფრენი აპარატები რუსეთის შორ მანძილზე დარტყმების კამპანიის ძირითადი ელემენტია უკრაინაში“ – აღნიშნავს დაზვერვა.
აქვე ვკითხულობთ, რომ რუსეთსა და ირანს შორის შეთანხმება გაფართოვდა და მოიცავს უპილოტო საფრენი აპარატების აწყობასა და წარმოებას რუსეთში.
ასევე, გააქტიურდა რუსეთ-ირანის დიპლომატიური და ეკონომიკური კავშირები.
დაზვერვა წერს, რომ ირანის ურთიერთობა რუსეთთან სავარაუდოდ გაღრმავდება დაგეგმილი ფორუმების საშუალებით.
ირანმა ცოტა ხნის წინ განაცხადა, რომ რუსეთმა 2.76 მილიარდი დოლარის ინვესტიცია განახორციელა ირანში 2022-23 წლებში. „ეკონომიკური კავშირები დიდი ალბათობით გაღრმავდება, რადგან რუსეთი სანქციების შერბილებას ცდილობს“ – ასკვნის ბრიტანეთის დაზვერვა.
_____________
ფოტოზე: რუსეთის და ირანის პრეზიდენტები. ფოტო: EPA-EFE/MIKHAEL KLIMENTYEV
