„ინფორმაცია არ გაქვს, შვიდი იპოთეკარი ოჯახი ცხოვრობს მაქ. სახელმწიფომ ომი არ აღიარა და ვერ გადაიხადეს გადასახადები. გაკოტრდა ოჯახები, ართმევდა ბანკი… მე წინააღმდეგი ბევრი რამის ვარ, მაგრამ საპარკინგე ზონაც არის“…
– „თქვენი მოთხოვნა არის ის, რომ ქობულეთში არ უნდა აშენდეს არაფერი?
– „რა პასუხს გასცემთ მოქალაქეებს?“
ამ ფრაზებით დაუპირისპირდნენ ქობულეთის საკრებულოს წევრები „ოცნების“ ფრაქციიდან, კოლეგას ილონა ანანიძეს, რომელიც საკრებულოს სხდომაზე, სადაც ორი გენგეგმა განიხილეს, ამტკიცებდა, რომ „ამდენი მასშტაბური მშენებლობა ქობულეთში დაუშვებელია.“
გარდა უსაფრთხოების საკითხებისა, ურბანული პოლიტიკა, რომელსაც ქობულეთის მერია მიმართავს, სეზონური გაქირავების დროს, მეორე ზოლში მცხოვრები მოსახლეობის უსახსროდ დარჩენას განაპირობებს – ამტკიცებდა საკრებულოს წევრი სხდომაზე.
„სასტუმროები აკლებენ ფასებს სეზონურად გარკვეულ სეგმენტზე, სხვადასხვა ღირებულების მომსახურებას სთავაზობენ. ამის პარალელურად მეორე ზოლში მცხოვრებლებს, ფაქტობრივად, ჩაუკეტეს ზღვაზე გასასვლელები. ასეთ ფონზე ადგილობრივები კონკურენციას ვერ უწევენ სასტუმროებს“, – განაცხადა საკრებულოს წევრმა.
მხოლოდ და მხოლოდ იმ არგუმენტით, რომ აქ მცხოვრებ მოსახლეობას სახლები იპოთეკით აქვთ დატვირთული, საკრებულომ გდგ დაამტკიცა. სხდომაზე არავის უთქვამს, რომ ინტენსიური გადახვევა ქალაქის ურბანული პოლიტიკიდან, რომელსაც დამტკიცებული გენგეგმა აქვს, შეიძლება მეორე მხრივ იმავე ადამიანებისთვის აღმოჩნდეს პრობლემა, ვინც ახლა ხსნას მხოლოდ მშენებლობაში ხედავს.
რა პასუხს გასცემ მოსახლეობას? – ჰკითხეს ილონა ანანიძეს საკითხის დამტკიცების შემდეგ. მან დოკუმენტის დამტკიცებას მხარი არ დაუჭირა.
„თუ მათ უჭირთ, არსებობს ამდენი სახელმწიფო პროგრამა და სხვანაირად დავეხმაროთ“, – შესთავაზა მან კოლეგებს, თუმცა ამაზე პასუხი არ მიუღია.
ქობულეთის საკრებულოს სხდომა
იგივე არგუმენტებით ითხოვდა მშენებლობის ნებართვას კომპანიაც.
შპს „ჯმს თაუერი 2022“-მა ქობულეთის მერიას აცნობა, რომ საპროექტო ტერიტორიაზე არსებული საცხოვრებელი სახლების უმეტესობა „დატვირთულია ვალდებულებებით ფინანსურ ინსტიტუტებთან“, ანუ „ჩადებულია ბანკში“.
კომპანიამ სამშენებლოდ მონიშნული მიწის ნაკვეთის განაშენიანების დეტალურ გეგმაში [გდგ] დიდი ადგილი დაუთმო იმის ახნას, რომ ერთადერთი გამოსავალი ამ სახლების დანგრევა და ახლი მრავალბინიანი კორპუსების მშენებლობაა:
„…ნაკისრი ვალდებულებების შეუსრულებლობის გამო ემუქრებათ გამოსახლება. ისინი პრობლემის მოგვარების გზას და გამოსავალს ხედავენ მხოლოდ ინვესტიციაში, რომლის განხორციელებაც შპს „ჯმს თაუერი 2022-ის“ მეშვეობით შესაძლებელია“.
„ბათუმელების“ მიერ შესწავლილ ნაკვეთის განაშენიანების ათეულობით დეტალურ გეგმაში მსგავსი ჩანაწერი არ შეგვხვედრია.
მერიაში წარდგენილი გდგ დოკუმენტის მიხედვით, სამშენებლო პროექტი ქობულეთის სანაპიროზე, აღმაშენებლის #301/303/305-ში სამი კორპუსის მშენებლობას ითვალისწინებს. საპროექტო ტერიტორია ერთ ჰექტრამდე ფართობს მოიცავს. მშენებლობას ორი კომპანია გეგმავს, თუმცა ქობულეთის მერიამ საკრებულოში დასამტკიცებლად განაშენიანების ერთი, გაერთიანებული, დეტალური გეგმა გადააგზავნა.
დეტალური გეგმის მიხედვით, შპს „ჯმს თაუერი 2022“ ფიჭვნარის დასახლებაში აღმაშენებლის ქუჩისა და სანაპირო ზოლს შორის არსებულ ტერიტორიას, ერთმანეთის მომიჯნავედ, 11 საკადასტრო ერთეულს აითვისებს.
მონიშნულია მიწის ნაკვეთები, რომელთა ათვისებასაც კომპანია გეგმავს
დოკუმენტში, რომელიც საკრებულოს წარუდგინეს, კომპანია განმარტავს, რომ საკვლევი არეალი მოიცავს საპროექტო ტერიტორიის მიმდებარედ ორ გეგმარებით კვარტალს, გამწვანებულ ტერიტორიებს შორის.
კომპანიამ დოკუმენტში ასევე ხაზგასმით განმარტა, რომ დღეის მდგომარეობით ტერიტორიაზე დარღვეულია ამ ზოლის ფუნქციური ხასიათი.
„ზოლის ერთგვაროვან უწყვეტობას რამდენიმე ქაოსურად განაშენიანებული საკარმიდამო მიწის ნაკვეთი არღვევს“, – წერს პროექტის ავტორი.
11 საკადასტრო ერთეულზე შპს „ჯმს თაუერი 2022“ მრავალბინიანი 20-სართულიანი კორპუსის მშენებლობას გეგმავს ერთი მიწისქვეშა სართულით. შპს „ჯეიმს თაუერი 2022“ დაგეგმილი პროექტის კოეფიციენტის გაზრდას 5.0- დან 7.0-მდე ითხოვს.
კიდევ ერთი კომპანია, რომელიც გდგ დოკუმენტში დასახელებული არ არის და რომლის სახელსაც ქობულეთის მერია მალავს, გვერდით მდებარე ფართობზე [6736 კვ.მეტრი] კიდევ ორი, 28 და 32-სართულიანი, მრავალბინიანი კორპუსების მშენებლობას გეგმავს.
მონიშნულია საპროექტო ტერიტორია
ამ ნაკვეთების მიმდებარედ 12-სართულიანი კორპუსის მშენებლობას გეგმავს კიდევ ერთი კომპანია, შპს „მიმა“.
ამ კომპანიას შოთა თოლორდავა ფლობს.
საპროექტო ტერიტორია
