29 სექტემბერს, ბათუმში „ტურიზმის ოსკარის“ სახელით ცნობილი ღონისძიება – World Travel Awards-ის საიუბილეო, ევროპის გალა ცერემონია გაიმართა.
აჭარის ტურიზმისა და კურორტების დეპარტამენტის ცნობით, ცერემონიის ფარგლებში ბათუმს 24 ქვეყნის ტურიზმის ინდუსტრიის, მედიისა და ტურიზმის სამთავრობო უწყებების 300-მდე წარმომადგენელი სტუმრობს.
აჭარამ წელს World Travel Awards-ის სპეციალური პრიზი მიიღო, როგორც ევროპის ყველა სეზონის ტურისტულმა მიმართულებამ, ხოლო ბათუმმა – როგორც ევროპის წამყვანმა განვითარებადმა ტურისტულმა მიმართულებამ,
ევროპის წამყვანი ბოტანიკური ბაღის წოდება კი ბათუმის ბოტანიკურმა ბაღმა მიიღო. ამ ნომინაციაში მისი კონკურენტები იყვნენ ანტვერპენის, ვარშავის, მადრიდის, ედინბურგის, ბერლინის და სხვა ევროპული ქვეყნების ბოტანიკური ბაღები.
World Travel Awards-ს ჯამში ასზე მეტი ნომინაცია აქვს, მათ შორის: საუკეთესო აეროპორტის, სასტუმროს და ა.შ.
World Travel Awards დაარსდა 1993 წელს, ტურიზმის ინდუსტრიაში გამორჩეული ადგილებისა და მიმართულებების გამოსავლენად. ღონისძიება ყველა წელს სხვადასხვა ქვეყანაში იმართება.
2022 წელს World Travel Awards-ზე ბათუმმა „ტურიზმის ოსკარი“ მოიპოვა, როგორც მსოფლიოს სწრაფად მზარდმა ტურისტულმა მიმართულებამ.
