მთავარი,სიახლეები

„უკრაინელები მიადგნენ ძირითადი თავდაცვის ზღუდეს“ – ინტერვიუ გადამდგარ გენერალთან

29.09.2023 • 1083
„უკრაინელები მიადგნენ ძირითადი თავდაცვის ზღუდეს“ – ინტერვიუ გადამდგარ გენერალთან

„იმედი მაქვს, თვითმფრინავებს საკმარის რაოდენობით მიაწვდიან უკრაინას და მაშინ შესაძლებელი იქნება ძალების გათანაბრება ჰაერში,“ – აღჭურვილობის უკრაინისთვის მიწოდების პროცესში გადამდგარი გენერალი ვახტანგ კაპანაძე მიიჩნევს, რომ მთავარი რაოდენობაა. იგი საომარი მოქმედებების გააქტიურებას მომავალი წლის გაზაფხულისთვის ელის.

გადამდგარი გენერალი ტაქტიკურ წარმატებად აფასებს თავდაცვის პირველი ზოლის გარღვევას, რაც უკრაინელებმა შეძლეს.

„თუმცა შემდეგი ეტაპების გავლა ადვილია მაშინ, როცა ეს ხდება სწრაფად,“ – შენიშნავს გადამდგარი გენერალი და თავის მოლოდინს გვიზიარებს: „…უკრაინელებმა გაიარეს უზრუნველყოფის ზონა და მიადგნენ ახლა ძირითადი თავდაცვის ზღუდეს. უკრაინელები ამ რესურსით, განსაკუთრებით საჰაერო მხარდაჭერის გარეშე, ვერ მიდიან წინ. მალე ისევ წვიმების სეზონი დაიწყება და ორივე დაიწყებს მომზადებას ზამთრისთვის,“ – ამბობს ვახტანგ კაპანაძე.

„ბათუმელებმა“ ვახტანგ კაპანაძესთან ინტერვიუ ჩაწერა. ის სამხედრო მეცნიერებათა დოქტორია და საქართველოს გენერალური შტაბის უფროსი ორჯერ იყო. ვახტანგ კაპანაძე ანალიტიკური ორგანიზაცია „ჯეოქეისის“ მრჩეველია.

  • ბატონო ვახტანგ, რა ვითარებაა ამჯერად ფრონტის ხაზზე, ამ დინამიკის გათვალისწინებით, რას შეიძლება მიაღწიოს უკრაინამ დაზამთრებამდე?

უკრაინას აქვს ტაქტიკური წარმატება და გარღვევა ორ მიმართულებაზე. ეს არის ბახმუტის მიმართულება, სადაც უკრაინას გარღვევა აქვს დაახლოებით 10 კილომეტრი სიგანის, არეხოვო-რობოტინოს მიმართულებაზე კი აქვს 6 კილომეტრამდე გარღვევა. ვფიქრობ, ამჯერად აქცენტი იქნება მიღწეულის შენარჩუნებასა და გამაგრებაზე, რომ პოზიციები გაიუმჯობესონ და ისევ განაგრძონ შეტევა.

უკრაინელები სამი მიმართულებით არ არიან და ამცირებენ შეტევას, კონცენტრაციას აკეთებენ სამხრეთით, ზაპოროჟიეს მიმართულებაზე.

რუსებსაც ჯერ არ აქვთ ის ძალა, რომ რომელიმე მიმართულებით შეტევა განახორციელონ. უკრაინელები ეცდებიან, რომ ბახმუტში რუსული ძალების „დაბმა“ შეძლონ, ამიტომაც კუპიანსკის მიმართულებიდან ძალები სამხრეთისკენ გადმოისროლეს უკრაინელებმა.

ამ ტემპს რასაც ვუყურებთ და ამ შესაძლებლობებით, რაც აქვს, მაქსიმუმ რასაც მიაღწევს უკრაინა, არის ამ პოზიციების გამაგრება. შესაძლოა, ასევე, ოდნავ გაფართოვდეს შეტევის შესაძლებლობები.

  • რა მასშტაბის გარღვევაა ეს, რაც ამ ეტაპზე შეძლეს უკრაინელებმა?

ეს არის ტაქტიკური წარმატება. ეს არ არის მეორე ხაზი, ან ასე შემდეგ. უკრაინელებმა გაიარეს უზრუნველყოფის ზონა და მიადგნენ ახლა ძირითადი თავდაცვის ზღუდეს. უკრაინელები ამ რესურსით, განსაკუთრებით საჰაერო მხარდაჭერის გარეშე, ვერ მიდიან წინ. მალე ისევ წვიმების სეზონი დაიწყება და ორივე დაიწყებს მომზადებას ზამთრისთვის.

  • თქვენთვის რა გზავნილი იყო სტოლტენბერგის მოულოდნელად კიევში ჩასვლა და დახურულ კარს მიღმა ზელენსკისთან შეხვედრა? მედიასთან გაჟღერდა, რომ სამხედრო ალიანსის წევრმა ქვეყნებმა ხელი მოაწერეს ჩარჩო კონტრაქტებს, რომლებიც უკრაინისთვის თითქმის ორ-ნახევარი მილიარდი ევროს მოცულობის საბრძოლო მასალების მიწოდებას ითვალისწინებს.

მოულოდნელი ჩასვლა ალბათ იმიტომ იყო, რომ არ იყო გაცხადებული. ზელენსკიც არაა იშვიათი სტუმარი დასავლეთში.

თუ არ ვცდები, უკრაინაზე სულ დახარჯულია 113 მილიარდი დოლარი. ეს თანხა კი, საჭირო იქნება საბრძოლო მასალის შევსებისთვის.

  • რა იცვლება რუსულ არმიაში? რუსული მედიის ცნობით, პუტინი შეხვდა „ვაგნერის“ ჯგუფის ხელმძღვანელებს, მათ შორის, გადამდგარ პოლკოვნიკს, ანდრეი ტროშევის და მათთან მოხალისეთა დანაყოფების ფორმირება განიხილა.

უკრაინელები უკვე ამბობენ, რომ გამოჩნდნენ კიდეც „ვაგნერელები“ რამდენიმე ასეულის შემადგენლობით ბახმუტის მიმართულებაზე, რამდენად სარწმუნოა, ამას ვერ გეტყვით, მაგრამ ვიცით, რომ „ვაგნერიდან“ ნაწილი შეიარაღებულ ძალებს შეუერთდა, ნაწილი ბელარუსში წავიდა და შემდეგ უკან დაბრუნდა.

„ვაგნერი“ უკვე ბრენდია რუსეთისთვის – ცხადია, ამას არ გააუქმებენ, გამოიყენებენ, როგორც წარმატებასთან ასოცირებულ, ჰეროიკული სულისკვეთების სახელს.

  • ომის კვლევის ამერიკული ინსტიტუტის [ISW] ბოლო ანგარიშის თანახმად, ამ დღეებში რუსეთის ჯარებმა შეანელეს შეტევითი ოპერაციების ტემპი კუპიანსკი-სვატოვო-კრემენნაიას ხაზის გასწვრივ, თუმცა ისევ აქტიურია სარაკეტო თავდასხმები. რატომ შეანელეს ტემპი რუსებმა? 

კი, ტემპი შეანელეს, რადგან რუსებიც გადაჯგუფებას აკეთებენ. შესაძლოა, რამდენიმე დანაყოფი გადაისროლონ სამხრეთისკენ, გასაძლიერებლად.

საუბარია იმაზე, რომ დონეცკის მიმართულებაზე 25-ე არმიაც იქნება ჩართული საომარ მოქმედებებში.

  • რისთვის ემზადება რუსეთი ამჯერად? 

რუსეთმა თუ შეძლო გარკვეული რესურსების მობილიზება, თანაც ახლა უკვე საშემოდგომო გაწვევა იწყება, არ არის გამორიცხული, რომელიმე ტაქტიკურ მიმართულებაზე განახორციელოს შეტევა ზამთარშიც.

ვფიქრობ, რომ მომავალი წლის გაზაფხულისა და ზაფხულისთვის იქნება ძირითადი მოქმედებები ორივე მხრიდან. არაა გამორიცხული, რუსები ისევ გადავიდნენ შეტევაზე. ფაქტია ეს და რუსეთმა დაიწყო შესაბამისი მოქმედება გარკვეულ მიმართულებაზე. ეს არის ხარკოვი-კუპიანსკის მიმართულება, სადაც წარმატება აქვთ რუსებს. სადაც წარმატება აქვთ, ლოგიკურია, რომ იქ განახორციელებენ შეტევას.

პლაცდარმი აქ უკვე შექმნილი აქვს. უფრო იოლია პლაცდარმიდან შეტევის დაწყება, ვიდრე თავდაცვითი მდგომარეობიდან, ანუ ამოსვლა სანგრებიდან და შეტევაზე გადასვლა. ხარკოვი-კუპიანსკის მიმართულებაზე თუ დაიწყებენ შეტევას რუსები, ამით აიძულებენ უკრაინელებს, სამხრეთიდან ძალები აქეთ გადმოისროლონ.

  • სამხრეთის მიმართულებაზე უკრაინელებს წინსვლის რა შანსი აქვთ? 

ზოგიერთი ვაი ექსპერტი იძახის, რომ აი, პირველ ხაზს რომ გაარღვევენ უკრაინელები, შემდეგი ეტაპების გავლა იქნება ძალიან იოლი. ეს ადვილია მაშინ, როცა გარღვევა ხდება სწრაფად. თუ სწრაფად ეს არ ხდება, მაშინ მოწინააღმდეგეს აქვს საშუალება, რომ გააძლიეროს შემდეგი ზღუდეები, განავითაროს სიღრმეში თავდაცვითი რაიონები.

დრო, რომელიც დაკარგა უკრაინამ ბახმუტისთვის ბრძოლაში, რუსებმა ძალიან კარგად გამოიყენეს და შექმნეს სუროვიკინის ხაზი. ვინაიდან ჯერჯერობით უკრაინელები ვერ ახერხებენ ამ სწრაფ გარღვევას, ეს აძლევს საშუალებას რუსებს, სიღრმეში გააძლიერონ თავდაცვა. ამას არ სჭირდება სამხედრო ხელოვნების და მეცნიერების ცოდნა, ნათელია, არა? – როდესაც მაქვს დრო, გავამაგრებ მეორე და მესამე ხაზს.

არ ვიცი, მოცემულობა როგორ შეიცვლება, მაგრამ ღია წყაროებიდან რა ინფორმაციაც ვრცელდება, 120-დან 70 თვითმფრინავი გაუნადგურეს უკრაინას, 30 ახლა დამატებით მისცა უკრაინას აღმოსავლეთ ევროპამ, მაგრამ 100 თვითმფრინავიც რომ ჰქონდეს ახლა უკრაინას, ეს არაა საკმარისი არანაირად 850-კილომეტრიან ფრონტზე…

აქ უკვე უპირატესობის მოპოვება კი არა, იმის რესურსიც არაა, რომ პარიტეტი მოიპოვო. ამის გამოა, რომ ქვეითებს ძალიან უჭირთ.

  • რის მიწოდებაც არის დაანონსებული უკრაინისთვის, ეს რამდენად გაათანაბრებს ძალებს? 

ეს მნიშვნელოვნად გააუმჯობესებს უკრაინელების მდგომარეობას, მაგრამ ყველაფერი დამოკიდებულია რაოდენობაზე. ამიტომაც იქნა შერჩეული F16, რომელიც უკვე მოძველებული მოდელია, მაგრამ ყველაზე მასიური წარმოების თვითმფრინავია და ბევრ ქვეყანას აქვს.

ეს თვითმფრინავები თავის დროზე შექმნილი იყო ჰაერში ბრძოლისთვის, თუმცა მას შეუძლია სახმელეთო ჯარების მხარდაჭერაც, რადიოლოკაციის სადგურების განადგურება.

იმედი მაქვს, თვითმფრინავებს საკმარისი რაოდენობით მიაწვდიან უკრაინას და მაშინ შესაძლებელი იქნება უკვე ძალების გათანაბრება ჰაერში.

  • ლავროვი ისევ ააქტიურებს გზავნილს, რომ რუსეთი მზადაა შეთანხმებისთვის „იმ რეალიების გათვალისწინებით, რომლებიც მიწაზე შეიქმნა“. რატომ შეიძლება ჰქონდეს ლავროვს იმის იმედი, რომ კიევი მოლაპარაკებაზე წავა?

ჩვენ არ ვიცით, რა ხდება კულუარებში. შესაბამისად, ზუსტად ვერაფერს ვიტყვით.

ბუნებრივია, უკრაინის გადასაწყვეტია, როდის ან საერთოდ დაჯდება თუ არა მოლაპარაკების მაგიდასთან. ეს ყველაფერი დამოკიდებულია უკრაინაზე. რუსეთი კი ისევ სარაკეტო დარტყმებით ცდილობს აიძულოს ეს უკრაინას, ისევ დარტყმები ენერგომატარებლებზე, რომ უკრაინა დარჩეს სიცივეში. ასე რომ, მარტივი ვითარება ნამდვილად არ არის.

უკრაინას ამ ეტაპზე ნამდვილად გააჩნია გარკვეული ტაქტიკური წარმატება და ამიტომაც, უკრაინას აქტიურად უნდა გაუგრძელდეს დახმარება.

უკრაინა რომ არ უნდა დამარცხდეს, ამაზე ორი აზრი არ არსებობს.

გადაბეჭდვის წესი


ასევე: