ომის კვლევის ამერიკული ინსტიტუტი [ISW] რუსეთ-უკრაინის ომის ყოველდღიურ მიმოხილვაში წერს, რომ რუსეთის სამხედრო სარდლობა განაგრძობს ელიტარული საჰაერო-სადესანტო ძალების გამოყენებას იმ პოზიციების დასაცავად, სადაც უკრაინა კონტრშეტევებს აწარმოებს.
ანგარიშის თანახმად, 27 აგვისტოს გამოქვეყნებული გეოლოკაციური კადრები მიუთითებს, რომ რუსეთის სამხედრო სარდლობამ 76-ე გვარდიის სადესანტო-საჰაერო თავდასხმის დივიზიის ნაწილები განათავსა რობოტინოს მახლობლად, რუსული პოზიციების გასამაგრებლად.
ISW-ი ადრე აღნიშნავდა, რომ პრაქტიკულად ყველა რუსული საჰაერო-სადესანტო ქვედანაყოფი მოქმედებს რაიონებში, სადაც უკრაინული ძალები აწარმოებენ კონტრშეტევით ოპერაციებს. ეს გადანაწილება კი მიუთითებს იმაზე, რომ ელიტარული რუსული ქვედანაყოფები გამოიყენება ფრონტის ხაზის კრიტიკული მონაკვეთების გასაძლიერებლად.
რუსეთის სამხედრო სარდლობა მუდმივად ეყრდნობოდა საჰაერო-სადესანტო ქვედანაყოფებს, როგორც შეტევით და თავდაცვით ძალებს. ეს ძალები, სავარაუდოდ, დეგრადირებულია მათი მაღალი ოპერატიული ტემპის გამო. ამ ძალების დეგრადაცია, სავარაუდოდ, შეასუსტებს რუსეთის უნარს, გააგრძელოს კომპლექსური თავდაცვითი ოპერაციები და შეაფერხებს რუსეთის ნებისმიერ განზრახვას, განაახლოს შეტევითი ოპერაციები.
დღეს, 29 აგვისტოს კი, დიდი ბრიტანეთის თავდაცვის სამინისტროს დაზვერვა ტვიტერზე წერს: მიუხედავად იმისა, რომ რუსეთის ხელისუფლება კარგად უხდის ომში ბრძოლის მსურველებს, ნაკლებსავარაუდოა ამას ეფექტი ჰქონდეს და მიიზიდოს მოხალისეები.
ბრიტანული დაზვერვა მიუთითებს 2022 წლის ოქტომბერში პუტინის მიერ გაკეთებულ განცხადებაზე, რომ მობილიზებული რიგითები მიიღებდნენ ხელფასს – თვეში 195 000 რუბლს.
დაზვერვა აღნიშნავს, რომ რუსეთის არმიაში ბევრი დაბალი ჩინის სამხედროა, რომლებიც ახლა უკრაინაში იბრძვიან და თვეში 200 000 რუბლზე მეტს იღებენ. ეს 2,7-ჯერ მეტია, ვიდრე საშუალო ხელფასი რუსეთში (72,851 რუბლი).
„…ხელფასი და დამატებითი ბენეფიტები არის ძლიერი სტიმული, განსაკუთრებით რუსეთის ღარიბ რეგიონებში მცხოვრებთათვის, თუმცა ნაკლებად სავარაუდოა რუსეთმა მიაღწიოს თავის მიზნებს მოხალისეების დაქირავებაში“, – წერს ბრიტანული დაზვერვა.
_____________
ფოტო: ევროპის პრესფოტო სააგენტო. EPA/YURI KOCHETKOV
