სარფის სანაპირო ზოლში კიბეების, ბილიკის, საშხაპეების, გასახდელებისა და ასევე, პლაჟზე ჩასასვლელი პანდუსის მოწყობაა დაგეგმილი.
სამუშაოების შესყიდვაზე ხელვაჩაურის მუნიციპალიტეტმა ტენდერი უკვე გამოაცხადა. შესყიდვის სავარაუდო ღირებულება 140 264 ლარია.
პირობის მიხედვით, „სამუშაოები უნდა შესრულდეს გეგმა-გრაფიკის ეტაპებით განსაზღვრულ ვადაში, რომელიც უნდა დაიწყოს ხელშეკრულების გაფორმებიდან არაუმეტეს 10 დღის ვადაში და დასრულდეს 2023 წლის 20 ნოემბრის ჩათვლით პერიოდში“.
ტენდერში წინადადებების მიღება 2023 წლის 12 აგვისტოს დაიწყება და 17 აგვისტოს დასრულდება.
სარფის პლაჟზე არსებული სიტუაცია [ზემოთ] და რენდერი პროექტიდან [ქვემოთ] / ფოტოები ტენდერიდან
- „2020 წლის პირველი იანვრიდან ტენდერის გამოცხადების თარიღამდე შესრულებული უნდა ჰქონდეს სამშენებლო-სარემონტო სამუშაოები საერთო ღირებულებით არანაკლებ 150 000 ლარის ოდენობით.
- გამოცდილებაში ჩაითვლება მხოლოდ მთლიანად დასრულებული სამუშაოები, რომლებიც გათვალისწინებულია შესაბამისი ხელშეკრულებით და რაზედაც გაფორმებულია შესაბამისი მიღება-ჩაბარების აქტ(ებ)ი;
- იმ შემთხვევაში, თუ პრეტენდენტის მიერ სახელმწიფო შესყიდვის ფარგლებში განხორციელებულია სამუშაოები, როგორც ქვეკონტრაქტორის მიერ განხორციელებული სამუშაოები, მხოლოდ იმ შემთხვევაში ჩაითვლება გამოცდილებად, თუ დასრულებულ სამუშაოებზე გაფორმებულია შესაბამისი მიღება-ჩაბარების აქტ(ებ)ი ძირითად კონტრაქტორებს შორისაც.
- ამასთან, პრეტენდენტი ვალდებულია წარმოადგინოს აღნიშნული აქტი, თუ იგი არ არის განთავსებული შესყიდვების ერთიან ელექტრონულ სისტემაში“.
სარფის პლაჟი შავი ზღვის სანაპიროს პლაჟებიდან ყველაზე მოკლეა და სულ რაღაც 500 მეტრია. ის ასევე ყველაზე უფრო მიმზიდველია სუფთა ზღვისა და იქვე ახლოს მდებარე კლდეების გამო.
ქვაომხაზე – ასე ჰქვია ლაზურად ლოდს, რომელიც პლაჟის ბოლოს ზღვაშია შეჭრილი, თუმცა ამ ლოდთან ბანაობა, უსაფრთხოებიდან გამომდინარე, აკრძალულია. მიუხედავად ამისა, აქ მაინც ბანაობენ.
მთავარი ფოტო: სარფი. ფოტო „ბათუმელების“ არქივიდან
ამავე თემაზე:
