ბათუმში, გორგილაძის ქუჩაზე მდებარე ხელოვნების მუზეუმის მიმდებარე სკვერში, სარეაბილიტაციო სამუშაოები ერთი თვის წინ დასრულდა, თუმცა სკვერში სკამები და სანაგვე ურნები დღემდე არ დაუდგამთ.
ტენდერში გამარჯვებულ კომპანია „ნიუ სთაილთან“ ბათუმის საქალაქო ინფრასტრუქტურისა და კეთილმოწყობის სამმართველომ მიღება-ჩაბარების აქტი [სამუშაოების დასრულებაზე] 2023 წლის 26 ივნისს გააფორმა.
„ახალი სკამები უკვე მზად არის, ჩვენი სურვილია, ისინი ამ შაბათ-კვირას [29-30 ივლისს] განათავსონ სკვერში, თუმცა ამინდზეც არის ეს დამოკიდებული. ამასთან, კომპანიას ხელშეკრულებით ჯერ ვადა აქვს და მიუხედავად ჩვენი სურვილისა, ვერ მოვთხოვთ. სკამებთან ერთად სკვერში ნაგვის ურნებიც დაიდგმება“, – გვითხრეს 27 ივლისს მერიის სამმართველოში.
ბათუმი, გორგილაძის ქუჩა / ამ სკვერში სამუშაოები ერთი თვის წინ დასრულდა, თუმცა აქ სკამები დღემდე არ დაუდგამთ/ სკამების დასადგამად კომპანიას კიდევ ერთი თვე აქვს / 26.07.2023
აღნიშნულ სკვერში და ასევე კიდევ 7 სკვერის მოწყობაზე მერიის სამმართველოს ტენდერი 2 275 853 ლარით ჰქონდა გამოცხადებული, ხელშეკრულება კი, შპს „ნიუ სთაილთან“ 1 788 791 ლარზე გააფორმა.
ხელშეკრულების მიხედვით, სამუშაოები კომპანიამ ყველა ლოკაციაზე 2023 წლის 30 აგვისტოს ჩათვლით უნდა დაასრულოს.
შესყიდვების პორტალის მიხედვით, კომპანიისთვის, დღევანდელი მდგომარეობით, ჯამში 869 637 ლარი – სახელშეკრულებო თანხის 49 პროცენტია გადარიცხული.
ამავე თემაზე:
2,2 მილიონი ლარი სკვერების მოსაწყობად ბათუმში – რა მისამართები შეარჩია მერიამ
