მზია ხალვაში ხელოვნების მასწავლებელია ქედის მუნიციპალიტეტის სოფელი წონიარისიდან. იგი სოფლის საჯარო სკოლაში ასწავლის ხელოვნებას, და, ასევე ჩართული სხვადასხვა აქტივობაში მუნიციპალიტეტის მასშტაბით.
მზია მასწავლებლის საკლასო ოთახი კალეიდოსკოპს ჰგავს და იქ შესული ბავშვებიც სხვადასხვა იდეის ირგვლივ ერთიანდებიან – ხან აჭარულ სახლს აშენებენ, ხან ქვებისგან აწყობენ პეიზაჟებს, ხანაც ქსოვენ ან კენჭებისგან ხიდებს აგებენ. მოკლედ, გამოგვყევით და ერთად ვნახოთ, რა ხდება მზია მასწავლებლის კლასში.
ნინი ბარამიძე წონიარისის სკოლის იდეატორთა კლუბის წევრია. ამ კლუბს ეკუთვნის აჭარული თანამედროვე ოდა-სახლის იდეაც, რომელიც გამოფენაზე ჰქონდათ წარმოდგენილი:
„დავიწყეთ ქვით და ზემოდან დავადგით აჭარული ოდა-სახლი. ვიზრუნეთ, რომ გაგვეკეთებინა, გამოგვეძერწა კეცები, ჭურები, შემდეგ კი, როცა ხის მასალა მოგვიტანეს, დავიწყეთ ხის მასალით კეთება. ავაშენეთ და დავდგით ჩვენი სახლი” – გვიყვება ნინი, წონიარისის სკოლის მოსწავლე.
ნინი ბარამიძე
კლასში ყველა მოსწავლე იპოვის თავისი გემოვნების შესაბამის საქმეს. სკოლის კიდევ ერთი მოსწავლე, თიკა ტაკიძე ამბობს, რომ აქ სამომავლოდ კარიერულადაც ივითარებენ უნარებს:
„ეს საკლასო ოთახი ჩვენ, წონიარისის საჯარო სკოლის მოსწავლეებს გვეხმარება იმაში, რომ უკეთ წარმოვაჩინოთ ჩვენი უნარები, შევისწავლოთ რამე ახალი, შემოქმედებითი უნარი განვივითაროთ და ასევე ამ ოთახის მნიშვნელობა არის ის, რომ მოსწავლეებმა უკეთ დაინახონ თავიანთი უნარ-ჩვევები არამარტო ხატვაში, არამედ ქსოვაში, ხელნაკეთი ნივთების დამზადებაში და ასე შემდეგ” – ამბობს ის.
მზია ხალვაში იხსენებს, რომ წონიარისის სკოლაში პატარა კაბინეტიდან დაიწყო მუშაობა და ახლა უკვე მისი კლასი სავსეა სხვადასხვა დროს მისი მოსწავლეების მიერ შექმნილი ნამუშევრებით. აქვე კედლებზე კიდია პედაგოგის ნამუშევრებიც, რომლებიც სტუდენტობის პერიოდში შექმნა და სხვადასხვა გამოფენაზე გამოფინა:
„ბავშვებისთვის, ვფიქრობ, ეს პერიოდი არის საინტერესო. შეიძლება ისინი მხატვრები არ გახდნენ, მაგრამ იმდენ ცოდნას მიიღებენ, რომ ეცოდინებათ ხელოვნების ფასი, იმ სილამაზის ფასი, როცა საკუთარი ხელით ქმნი”.
მზია ხალვაში
სკოლის მოსწავლეებმა გასულ წელს შექმნეს კლუბიც, რომელშიც მოსწავლეები ქვებისგან და სხვადასხვა მასალისგან ამზადებდნენ ნამუშევრებს. ეს ტექნიკა მათ სოციალური ქსელის საშუალებით აღმოაჩინეს, მზია მასწავლებლის გაკვეთილზე დახვეწეს უნარები, შემდეგ კი სხვებსაც გაუზიარეს ცოდნა:
„რა თქმა უნდა, მხოლოდ გაკვეთილის დროს ვერ ვქმნიდით ისეთ ნამუშევრებს, როგორიც ჩვენ მოგვწონდა და გვინდოდა, რომ შეგვექმნა. შემდეგ აღმოვაჩინეთ განათლების სამინისტროს პროექტი, რომელიც ითვალისწინებდა სასკოლო პროექტების დაფინანსებას, გადავწყვიტეთ, რომ მიგვეღო მონაწილეობა კონკურსში, გავიმარჯვეთ, შევქმენით კლუბი, შევიძინეთ სამუშაო მასალები: თექა, სამუშაო დაფები და ასე შემდეგ. აღმოვაჩინეთ, რომ ჩვენ გარდა ძალიან ბევრი დაინტერესებული მოსწავლე იყო, რომლებსაც სურდათ კლუბში გაწევრიანება და ჩვენთან ერთად მუშაობა.
აქ იყვნენ როგორც მაღალი კლასის მოსწავლეები, ისე პატარები, რომლებსაც ვუზიარებდით იმ ცოდნას, რაც კლუბის შექმნამდე გაკვეთილების დროს მივიღეთ და ვქმნიდით ნამუშევრებს.
გარდა ამისა, კლუბის სახელით მონაწილეობა მივიღეთ წითელი ჯვრის მიერ ორგანიზებულ საქველმოქმედო აქციაში თურქეთში, მიწისძვრით დაზარალებულების დასახმარებლად“ – გვიყველა წონიარისის სკოლის მოსწავლე, თეა წულუკიძე.
პროექტებზე ჯგუფურად მუშაობა, მზია მასწავლებლის აზრით, ბავშვებში სამომავლოდ უფრო მეტ დაინტერესებას და ჩართულობას იწვევს, მოსწავლეები სწავლობენ ახალ მასალებთან მუშაობას:
„როცა აჭარული სახლის პროექტზე მუშაობა დასრულდა, დავინახე, რომ ბავშვები უფრო მეტად დაინტერესდნენ, ურთიერთობა ისწავლეს, ამ მასალებზე შრომა ისწავლეს და საბოლოოდ გამოვიდა არაჩვეულებრივი რაღაც“.
მზია ხალვაში გვიყვება, რომ ქედის საჯარო სკოლაში ნორვეგიის მთავრობისა და გაეროს ბავშვთა ფონდის მხარდაჭერით გაიხსნა ინკლუზიური განათლების ცენტრი – სახვითი ხელოვნების წრე, სადაც იგი სხვადასხვა საჭიროების მქონე ბავშვებს უტარებს ხელოვნების გაკვეთილებს:
„მათ ეს გაკვეთილები უვითარებთ წარმოსახვის უნარს, მეტყველებას, მოტორიკას, ისინი აქ სწავლობენ კომუნიკაციას და აქტიურად არიან ჩართულნი“ – ამბობს პედაგოგი.
