უკრაინის თავდაცვის სამინისტროს დაზვერვის დეპარტამენტის განცხადებით, ბოლო ცნობების თანახმად, რუსმა ოკუპანტებმა თანდათან დაიწყეს ზაპოროჟიეს ატომური ელექტროსადგურის დატოვება. ამის შესახებ უკრაინის დაზვერვა ტელეგრამზე წერს.
დაზვერვის ცნობით, ერთ-ერთმა პირველებმა სადგური დატოვეს „როსატომის“ თანამშრომლებმა, რომლებიც ხელმძღვანელობდნენ რუსეთის კონტინგენტს სადგურზე. ასევე, ევაკუაციის რეკომენდაცია მიიღეს უკრაინელმა თანამშრომლებმა, რომლებსაც კონტრაქტი აქვთ „როსატომთან“. მითითების თანახმად, მათ 5 ივლისამდე უნდა დატოვონ სადგური.
დაზვერვა წერს, რომ მათ ურჩევენ გამგზავრებას დროებით ოკუპირებული ყირიმის ტერიტორიაზე.
უკრაინის დაზვერვა ასევე ხაზს უსვამს, რომ ენერგოდარში და ატომური ელექტროსადგურის ტერიტორიაზე თანდათან მცირდება სამხედრო პატრულების რაოდენობა.
„სადგურზე დარჩენილ პერსონალს მიეცა მითითება ნებისმიერი ავარიული სიტუაციის შემთხვევაში დაადანაშაულონ უკრაინა“, – წერს დაზვერვა.
22 ივნისს უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთი ამზადებს ტერაქტს ზაპოროჟიეს ატომურ ელექტროსადგურზე.
უკრაინაში მდებარე ზაპოროჟიეს ატომური ელექტროსადგური რუსმა საოკუპაციო ძალებმა 2022 წლის 4 მარტს დაიკავეს.
ზაპოროჟიეს ატომური ელექტროსადგური 1984-1995 წლებში აშენდა. ეს უდიდესი ატომური ელექტროსადგურია ევროპაში, ხოლო მსოფლიოში მეცხრე ადგილზეა სიდიდით.
________________
ფოტო: EPA-EFE/SERGEI ILNITSKY
ამავე თემაზე:
ზაპოროჟიეს ატომური ელექტროსადგური – ყველაფერი, რაც უნდა ვიცოდეთ
