რუსეთიდან საქართველოში ფულადი გზავნილები 2023 წლის მაისში შემცირდა – რუსეთიდან სულ 154,72 მლნ აშშ დოლარი გადმორიცხეს. ეს 50 %-იანი კლებაა „ჩარიცხული მოცულობის წლიური ზრდის ტემპის“ მიხედვით.
განახლებულ მონაცემებს საქართველოს ეროვნული ბანკი აქვეყნებს.
2023 წლის აპრილში რუსეთიდან საქართველოში 159 მლნ აშშ დოლარი გადმორიცხეს [ზრდა 19 %], მარტში – 223 მლნ აშშ დოლარი [ზრდა 727%], თებერვალში – 187 მლნ აშშ დოლარი [ზრდა 753 %], იანვარში – 267 მლნ აშშ დოლარი [ზრდა 1095 %]
რუსეთიდან ფულადი გზავნილების მკვეთრი ზრდა 2022 წლის აპრილიდან დაიწყო, როცა მობილიზაციას გამოქცეულმა რუსეთის მოქალაქეებმა მასობრივად დაიწყეს საქართველოში საცხოვრებლად გადმოსვლა – 2022 წლის აპრილში, მაგალითად, რუსეთიდან საქართველოში გადმორიცხულმა ფულადმა გზავნილებმა 132.98 მილიონი აშშ დოლარი შეადგინა. ეს 300%-იანი ზრდა იყო.
2022 წლის აპრილის შემდეგ 2023 წლის მაისი პირველი შემთხვევაა, როცა რუსეთიდან ფულადი გზავნილების წლიური მაჩვენებელი კლებადი გახდა, თანაც წლიური 50 %-ით.
2023 წლის პირველ 3 თვეში საქართველოში რუსეთის ფედერაციიდან 298 285 საზღვრის კვეთა დაფიქსირდა – ასეთია საქართველოს შინაგან საქმეთა სამინისტროს ოფიციალური მონაცემები.
დღემდე ხელისუფლება არ ამბობს კონკრეტულ ციფრს: რუსეთის რამდენი მოქალაქე იმყოფება ამჟამად საქართველოში.
რაც შეეხება სხვა ქვეყნებიდან ულადი გზავნილების ზრდას – ეროვნული ბანკის მონაცემებით, ყველაზე მეტი ფული ევროპის ქვეყნებს შორის იტალიიდან იგზავნება – მაისში 44.17 მლნ აშშ დოლარი [წლიური ზრდა 19 %], 48 %-ით გაზრდილა მაისში გერმანიიდან ფულადი გზავნილები – 19 მლნ აშშ დოლარი.
აშშ-დან საქართველოში კი, 2023 წლის მაისში, ფულადმა გზავნილებმა 38.30 აშშ დოლარი დოლარი შეადგინა. ეს 37 %-იანი წლიური ზრდის მაჩვენებელია.
