„ძალიან მიყვარს ანბანი და თვითონ ანბანის კოშკი არის ძალიან უნიკალური. ძალიან მიყვარს იქ სტუმრობა… მომწონს სიამაყე, რაც არსებობს ქართველებში, როდესაც ისინი საუბრობენ თავიანთ ანბანზე, ენაზე, როგორ ამაყობენ ამით ქართველები,“ – გვითხრა კლერ მესონმა, USAID-ის პროგრამების ოფისის ხელმძღვანელმა „ბათუმელებთან“ ინტერვიუს დროს, როცა ის ბათუმზე საუბრობდა და ხაზი გაუსვა, ბათუმში გამორჩეულად ანბანის კოშკი მომწონსო.
-რა მოგეწონათ ქართულ ანბანში? – ვკითხეთ კლერ მესონს.
– „პირველ რიგში, ძალიან ლამაზია. თუ ისტორიას გადავხედავთ, საბჭოთა კავშირის პერიოდში, საქართველოს მოსახლეობამ იბრძოლა და დაიცვა თავისი ენა, ეს აჩვენებს ძალიან კარგად იმას, თუ ვინ არის ქართველი ხალხი. თქვენ ყოველთვის იყავით ძლიერი და ამაყი ადამიანები, რომლებიც ისწრაფოდით დამოუკიდებლობისკენ და შეინარჩუნეთ ეს დამოუკიდებლობა.
ეს ცალსახად მიუთითებს იმას, თუ როგორი გინდათ იყოს თქვენი მომავალი,“ – აღნიშნა კლერ მესონმა. მას ასევე ვკითხეთ, მოახერხა თუ არა ქართულის სწავლა.
– „სამწუხაროდ, არ მქონდა იმის დრო, რომ ქართული ენა მესწავლა… მომწონს ძალიან, როცა დავდივარ საქართველოში და ვეკითხები ყველას, როგორ ვთქვა დასახელება, ხალხს ვთხოვ გამოთქმაში დახმარებას,“ – გვითხრა კლერ მესონმა.
კლერ მესონის აზრით, საქართველოს ტურისტული შესაძლებლობებით დასავლეთში ბევრად მეტი ტურისტის დაინტერესება შეიძლება, თანაც მაღალბიუჯეტიანი ტურისტების.
-„ძალიან ბევრი ადგილის მონახულება შეიძლება აქ, როცა კარგი ამინდია. იმედია, უფრო მეტი ტურისტი ჩამოვა აქ არა მარტო რუსეთიდან, არამედ ევროპიდანაც.
ვხედავთ, რომ ბევრი ევროპელი ჩამოდის. გერმანელები ჩამოდიან. მათ აინტერესებთ კულტურული მემკვიდრეობა საქართველოში, აინტერესებთ შავი ზღვა.
ყველა ადგილი ლამაზია, თუნდაც, თუ ახვალთ მთიან აჭარაში, კარგია თუ ახვალთ სასეირნოდ. ჩვენ ვმუშაობთ საქართველოს ტურიზმის სააგენტოსთან, რათა გავზარდოთ მათი შესაძლებლობები, რომ მეტად მოიზიდონ ტურისტები დასავლეთიდან.
საუბარია მაღალბიუჯეტიან ტურისტებზე, რომლებიც უფრო მეტს დახარჯავენ აქ და ხელს შეუწყობენ მთლიანი, დიდი ბაზრის შექმნას საქართველოში,“ – გვითხრა კლერ მესონმა.
