მოსამართლე ჯუმბერ ბეჟანიძემ დააკმაყოფილა ლადო მჟავანაძის სარჩელი. ლადო მჟავანაძე 86 წლისაა და გონიოში ცხოვრობს. ის უკვე 10 წელზე მეტია მიწის რეგისტრაციას ითხოვს. მას ამისთვის ხანგრძლივი ბრძოლა დასჭირდა.
იმავე მოსამართლემ ლადო მჟავანაძის სარჩელი 2020 წელს არ დააკმაყოფილა, თუმცა სააპელაციო სასამართლომ, შემდეგ კი უზენაესმა სასამართლომ, მოსამართლე ჯუმბერ ბეჟანიძეს საქმის ხელახლა განხილვა დაავალა – 86 წლის კაცი სასამართლოში ბათუმის მუნიციპალიტეტის მიწის კომისიის წინააღმდეგ დავობდა, მას ყოფილი მეურნეობის მიერ გადაცემული მიწის საკუთრების აღიარებაზე 2017 წელს უარი უთხრეს.
საუბარია გონიოში კონკრეტული მიწის ნაკვეთის რეგისტრაციაზე. „ეს მიწები გონიოელებს მოგვცა ციტრუსის მეურნეობის დირექტორმა, კირილე ბერიძემ, ოფიციალურად გაფორმდა აქტები… ჭაობი იყო, ამოვაშრეთ და ბოსტნები მოვაწყვეთ, ბოსელიც მქონდა, რომელიც 2012 წელს დამინგრიეს,“ – ამბობს ლადო მჟავანაძე. 87 ოჯახი მეურნეობისგან გადაცემულ მიწებს ამ დრომდე იყენებს თუმცა მიწის აღიარების კომისია მათ საკუთრებაში გადაცემაზე უარს ამბობს.
ლადო მჟავანაძე [მარცხნივ] სასამართლო გადაწყვეტილების შემდეგ. 3 მაისი
იურისტი ანა ბერძენიშვილი განმარტავს, რომ რადგან სადავო მიწის ნაკვეთი ჯერ დარეგისტრირდა ხელვაჩაურის, ხოლო შემდეგ აჭარის ავტონომიური რესპუბლიკის საკუთრებად, ბათილად იქნა ცნობილი მათი განკარგულებები და მიმართვები, რადგან სამომავლოდ ხელი არ შეეშალოს ლადო მჟავანაძის რეგისტრაციას საჯარო რეესტრის ეროვნულ სააგენტოში.
ამ თემაზე:
80 წლის კაცმა მერიას სასამართლო 2-ჯერ მოუგო, მაგრამ მერია მიწას მაინც არ ურეგისტრირებს
