განათლება,მთავარი,სიახლეები

გასულ წელს 814-მა მოსწავლემ კლასი ვერ დაძლია

06.04.2023 • 2201
გასულ წელს 814-მა მოსწავლემ კლასი ვერ დაძლია

2021-2022 სასწავლო წელს ანუ შარშან 814-მა მოსწავლემ ვერ დაძლია კლასი. მათ შორის იყო 21 პირველკლასელი და 51 მოსწავლე მეორედან მეხუთე კლასის ჩათვლით.

კლასი ვერ დაძლია ანუ ეროვნული სასწავლო გეგმით გათვალისწინებული საკლასო მასალა ვერ დაძლია 742-მა უფროსკლასელმაც.

  • მეცხრე კლასი – 230 მოსწავლე
  • მეათე კლასი – 146 მოსწავლე
  • მეთერთმეტე კლასი – 116 მოსწავლე 
  • მეთორმეტე კლასი – 81 მოსწავლე

„ბათუმელებმა“ მოსწავლეების მხრიდან კლასის ვერდაძლევის მონაცემები განათლების მართვის საინფორმაციო სისტემიდან გამოითხოვა.

სასკოლო მასალის ვერდაძლევის ტენდენცია მზარდია პანდემიის ანუ 2019-2020 სასწავლო და 2020-2021 სასწავლო წლებში.

მაგალითად, თუ პანდემიის პირველ წელს – 2020-ში, სასკოლო მასალა ვერ დაძლია 14-მა პირველკლასელმა, მომდევნო სასწავლო წელს ეს რიცხვი 47-მდე გაიზარდა.

2020-2021-2022 სასწავლო წლებში კლასი მთლიანობაში ვერ დაძლია 1762-მა მოსწავლემ სხვადასხვა ეტაპზე.

  • 2019-2020 წელი – 414 მოსწავლე
  • 2020-2021 – 534 მოსწავლე
  • 2021-2022 – 814 მოსწავლე

როგორც განათლების მართვის საინფორმაციო სისტემიდან მოგვწერეს, მათთვის უცნობია, რა იყო კლასის ვერ დაძლევის მიზეზი მოსწავლეების მხრიდან, რადგან მსგავს ინფორმაციას აღნიშნული უწყება არ აწარმოებს.

შესაბამისად, უცნობია რაზე დაყრდნობით მუშაობს სასკოლო დანაკარგების აღმოფხვრაზე განათლების სამინისტრო ან საერთოდ მუშაობს თუ არა.

რატომ იზრდება კლასის ვერდაძლევის მაჩვენებელი, ამ კითხვით „ბათუმელებმა“ განათლების სამინისტროს მიმართა.  განათლების სამინისტროს პრესსამსახურიდან გვიპასუხეს, რომ ამ კითხვაზე პასუხი „ასე უბრალოდ, არ გამოვა“.

„ყველა შემთხვევა სათითაოდ უნდა განიხილონ და შეაჯამონ, რადგან მიზეზი შეიძლება იყოს ბევრნაირი.  რადგან ეს ინფორმაცია დასამუშავებელია, საჭიროა ოფიციალურად მოგვმართოთ“- გვეუბნებიან პრესსამსახურში.  რაც იმას ნიშნავს, რომ განათლების სამინისტროს  აღნიშნული პრობლემა არ უკვლევია.

პანდემიის პერიოდში წარმოშობილი სასკოლო დანაკარგების თემაზე „განათლების კოალიცია“ მუშაობდა. რა ნაბიჯები გადადგა სამინისტრომ პრობლემების აღმოსაფხვრელად, ამ კითხვაზე ვერც მათ მიიღეს სამინისტროსგან პასუხი.

„იმ პერიოდში, როცა ამ თემაზე აქტიური იყო დისკუსია, ჩვენც ვაყენებდით საკითხს, რომ პროგრამა გაკეთებულიყო მედიაციის კუთხით, თუმცა მაშინ ითქვა, რომ შეისწავლიდნენ სასკოლო დანაკარგებს.

ამის შემდეგ გაკეთდა ჩანაწერი ეროვნული სტრატეგიის დოკუმენტში, თუმცა ამ ჩანაწერის იქეთ, დაიწყო თუ არა მუშაობა და გაკეთდა თუ არა რაიმე ინტერვენცია, ინფორმაცია არ გვაქვს, ასეთი კვლევა არსად გვინახია. შესაძლოა რაიმე კეთდება და ჩვენამდე არ მოსულა ეს ინფორმაცია“, – ამბობს ირინა ხანთაძე, „განათლების კოალიციის“ გამგეობის თავმჯდომარე.

ბოლო სამი წლის განმავლობაში მცირედი კლებაა ექსტერნის გამოცდებზე.

2020 წელს ექსტერნის გამოცდაზე 941 მეთორმეტეკლასელი დარეგისტრირდა, მომდენო წელს – 909, გასულ წელს კი – 918.

სხვა კლასების მონაცემებს განათლების მართვის საინფორმაციო ცენტრი არ აწარმოებს.

ექსტერნის გამოცდაზე მოსწავლე იმ შემთხვევაში რეგისტრირდება, თუ კონკრეტული საგნისთვის დათმობილი საათების 30 პროცენტი აქვს გაცდენილი.

ეს იმას ნიშნავს, რომ ამ გამოცდაზე დარეგისტრირებული მოსწავლეები რაღაც მიზეზით გაკვეთილებსაც არ ესწრებოდნენ.

სახალხო დამცველის ბოლო ანგარიშის მიხედვით, 2022 წელს საქართველოში 12 792-მა მოსწავლემ მიატოვა სკოლა, მათ შორის, უმრავლესობამ – 10 235-მა მოსწავლემ მე-9 კლასის მიღწევამდე შეწყვიტა სწავლა.

სკოლის მიტოვების მიზეზებს შორის ყველაზე ხშირად მშობლის მიერ განცხადების დაწერაა მითითებული ანგარიშში, ასევე, სკოლის გაცდენა. მიზეზებს შორის სახელდება „მუშაობის დაწყებაც“.

გადაბეჭდვის წესი


ასევე: