მთავარი,სიახლეები

პუტინის დაკავება ნიშნავს რუსეთისთვის ომის გამოცხადებას – მედვედევი

23.03.2023 • 1631
პუტინის დაკავება ნიშნავს რუსეთისთვის ომის გამოცხადებას – მედვედევი

რუსეთის ფედერაციის უშიშროების საბჭოს თავმჯდომარის მოადგილე, დიმიტრი მედვედევი აცხადებს, რომ ჰააგის სისხლის სამართლის საერთაშორისო სასამართლოს გადაწყვეტილება პუტინის დაკავებაზე ორდერის გაცემის შესახებ ნიშნავს ომის გამოცხადებას რუსეთის ფედერაციასთან.

რუსულ საინფორმაციო სააგენტოებთან ინტერვიუში მან კომენტარი გააკეთა გერმანიის იუსტიციის მინისტრის ციტატაზე იმის შესახებ, რომ თუ პუტინი გერმანიაში ჩავა, მას დააპატიმრებენ.

„მოდით, წარმოვიდგინოთ – გასაგებია, რომ ეს ის სიტუაციაა, რომელიც არასოდეს მოხდება, მაგრამ მაინც წარმოვიდგინოთ, რომ მოხდა. ბირთვული სახელმწიფოს მოქმედი მეთაური ჩავიდა, ვთქვათ, გერმანიაში და დააკავეს. ეს რა არის? – ომის გამოცხადება რუსეთის ფედერაციისთვის! და ამ შემთხვევაშიც მთელი ჩვენი ძალები გაფრინდება ბუნდესტაგში, კანცლერის ოფისში და ა.შ.

ის [გერმანიის იუსტიციის მინისტრი] ხვდება, რომ ეს ომის გამოცხადებაა? თუ ცუდად სწავლობდა?“ – განაცხადა მედვედევმა.

მან ჰააგის საერთაშორისო სასამართლოს „იურიდიული არარაობა“ უწოდა, „რომელსაც არაფერი გაუკეთებია მნიშვნელოვანი, დაარსების დღიდან“.

ჰააგის სისხლის სამართლის საერთაშორისო სასამართლომ ვლადიმერ პუტინის დაკავებაზე ორდერი 17 მარტს გამოსცა.

პუტინთან ერთად ორდერი გამოიცა მარია ლვოვა-ბელოვას დაკავებაზეც. ამ უკანასკნელს რუსეთის პრეზიდენტის ადმინისტრაციაში ბავშვთა უფლებების კომისრის თანამდებობა უკავია.

როგორც განცხადებაში ვკითხულობთ, პუტინსა და ლვოვა-ბელოვას ბრალი წაუყენეს ბავშვების უკანონო დეპორტაციისთვის უკრაინის ოკუპირებული ტერიტორიებიდან რუსეთში, რაც ომის დანაშაულად მიიჩნევა.

გადაბეჭდვის წესი


ასევე: