ქუთაისის სააპელაციო სასამართლომ წინასწარი პატიმრობიდან გაათავისუფლა მამუკა ანდღულაძ. მას გამოძიება „ტვ პირველის“ ჟურნალისტ ნატო გოგელიაზე ფიზიკურ ძალადობას, ჟურნალისტის პროფესიულ საქმიანობაში ხელშეშლას და სხვისი ნივთის დაზიანების ან განადგურებას ედავება.
ჟურნალისტ ნატო გოგელიას თქმით, მას სააპელაციო სასამართლოდან დაუკავშირდნენ და უთხრეს, რომ ბრალდებულს სასამართლომ გირაოს – 3 ათასი ლარის გადახდა დააკისრა. ამ დრომდე ბრალდებულს ბათუმის საქალაქო სასამართლოს გადაწყვეტილების საფუძველზე წინასწარი პატიმრობა ჰქონდა შეფარდებული.
15 მარტს ჟურნალისტი ნატო გოგელია ოზურგეთში, სოფელ ბახვში, იმ კაცის კომენტარის ჩაწერას ცდილობდა, რომელმაც თბილისში, პარლამენტის შენობის წინ, პრორუსული „ალტ-ინფოს“ მიერ ორგანიზებულ აქციაზე ევროკავშირის დროშა ჩამოხია.
გუშინ, 20 მარტს, მედიის ადვოკატირების კოალიციამ მოუწოდა სპეციალურ საგამოძიებო სამსახურს დაცვის სპეციალური ღონისძიებების გამოყენებისკენ ჟურნალისტ ნატო გოგელიასა და მისი არასრულწლოვანი შვილების მიმართ.
„…მოძალადე პირის მხარდამჭერთა მხრიდან, ჟურნალისტის მიმართ დაფიქსირდა არაერთი მუქარა, რაც დაუყოვნებლივ რეაგირებას მოითხოვს. ნატო გოგელიას ინტერესებს კოალიციის წევრი ორგანიზაცია „მედიაომბუდსმენი” იცავს. ჟურნალისტის და მისი არასრულწლოვანი შვილების დაცვის საჭიროებებიდან გამომდინარე, სპეციალურ საგამოძიებო სამსახურს უკვე წარედგინა დამატებითი მტკიცებულებები.
აღნიშნულიდან გამომდინარე, მედიის ადვოკატირების კოალიცია მიმართავს სპეციალურ საგამოძიებო სამსახურს, დაუყოვნებლივ შეისწავლოს ჟურნალისტის და მისი არასრულწლოვანი შვილების უფლებების შელახვის ფაქტები, მიანიჭოს მათ სავარაუდო მსხვერპლის სტატუსი და გამოიყენოს საქართველოს კანონმდებლობით გათვალისწინებული დაცვის სპეციალური ღონისძიებები,“ – აღნიშნულია მედიის ადვოკატირების კოალიციის მიერ გავრცელებულ განცხადებაში.
ნატო გოგელიას თქმით, ამ დრომდე სპეციალურ საგამოძიებო სამსახურს მუქარაზე ის არ გამოუკითხავს.
„ნატო გოგელიას, ისევე როგორც ნებისმიერი ჟურნალისტის, ინტერესია იმუშაოს უსაფრთხო გარემოში, თავს არ ესხმოდნენ კითხვების დასმის გამო, მოახერხოს ინფორმაციის მიღება და გავრცელება ყოველგვარი ჩარევისგან დამოუკიდებლად,“ – განმარტავს ნათია კაპანაძე, ორგანიზაცია „მედიაომბუდსმენის“ ხელმძღვანელი.
„საქართველოს სისხლის სამართლის კოდექსის 154ე მუხლის პირველი პუნქტით, ჟურნალისტისათვის პროფესიულ საქმიანობაში უკანონოდ ხელის შეშლა ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ორმოც საათამდე ან გამასწორებელი სამუშაოთი ვადით ორ წლამდე ანდა შინაპატიმრობით ვადით ექვსი თვიდან ორ წლამდე. გამოძიების დაწყება 154-ე მუხლით ერთ-ერთი ნაწილია ჟურნალისტების უფლებების დასაცავად.
ცხადია, ჩვენ გავაგრძელებთ სამართლებრივ პროცედურებს ნატო გოგელიაზე თავდასხმის ამ შემთხვევას შედეგად მოჰყვეს ჟურნალისტების უფლებების დარღვევის უარყოფითი პრაქტიკის შეწყვეტა.
ჩვენთვის პრიორიტეტია შეწყდეს მუქარაც ნატო გოგელიას და მისი არასრულწლოვანი შვილების მისამართით, ამიტომ კიდევ ერთხელ მივმართეთ განცხადებით სპეციალურ საგამოძიებო სამსახურს, გარდა კონკრეტული ინციდენტის გამოძიებისა, მიიღოს ზომები ჟურნალისტის და მისი არასრულწლოვანი შვილების მხარდასაჭერად,“ – გვითხრა ნათია კაპანაძემ.
