ბათუმში რეგისტრირებული ინსულინდამოკიდებული პაციენტები ორი დღე ინსულ-ლანტუსს და ინსულ-აპიდრას ვერ იღებდნენ. პაციენტებს ეუბნებოდნენ, რომ წამლის მიწოდებაში შეფერხება იყო.
ნათია შავაძე რამდენიმე წელია ინსულინზეა დამოკიდებული. ორშაბათს, 20 მარტს, ინსულინის ასაღებად მისულ ნათიას მეუღლეს უთხრეს, რომ ინსულინი პარასკევამდე არ იქნებოდა.
„ინსულინდამოკიდებული ადამიანები სამ თვეში ერთხელ ვიღებთ სახელმწიფოსგან ინსულინს. ჩემი მეუღლე იყო მისული ასაღებად და უთხრეს, რომ არ აქვთ ინსულინი და იქნება პარასკევს. უკვე დღევანდელი დოზა აღარ მქონდა. ინსულინი რომ არ მიიღოს ადამიანმა, ეს ნიშნავს, რომ კომაში ჩავარდება. კერძო აფთიაქებში კი იშოვება, მაგრამ რთული საპოვნელია. ბევრი ადამიანი შეიძლება იყოს ჩემსავით, რომელსაც დღეს უმთავრდებოდეს ან ხვალ ინსულინი,“ – უთხრა „ბათუმელებს“ ნათია შავაძემ.
ნათიამ ინსულინი ერთ-ერთ კერძო აფთიაქში იყიდა.
სახელმწიფოს აქვს აღებული ვალდებულება ინსულინდამოკიდებული პაციენტების წინაშე, რომ მათ დროულად მიაწოდოს საჭირო მედიკამენტი.
დღეს, 21 მარტს, დაახლოებით 12 საათზე, ბათუმში ინსულინის გამცემ ცენტრში „ბათუმელებს“ უთხრეს, რომ ინსულ-ლანტუსი და ინსულ-აპიდრა არ ჰქონდათ.
კითხვაზე, როდის იქნებოდა ინსულინი ცენტრში, აქ გვიპასუხეს, რომ 22 მარტს, ხოლო პრეტენზიის შემთხვევაში, გვირჩიეს, ჯანდაცვის სამინისტროს ცხელ ხაზზე, 1505-ზე დაგვერეკა.
„ბათუმელები“ დაუკავშირდა ჯანმრთელობის ეროვნული სააგენტოს აჭარის რეგიონული სააგენტოს წარმომადგენელს, ზაირა მელაძეს. ის „ბათუმელებთან“ საუბრისას ირწმუნებოდა, რომ ბათუმში ინსულინის დეფიციტი არ იყო და ყველა პაციენტს შეეძლო მიეღო მედიკამენტი.
„მიღებულია საკმარისი ოდენობა. არანაირი პრობლემა არ არსებობს, აფთიაქშიც დავრეკე, ჩვენი მხრიდან და სახელმწიფოს მხრიდან შეფერხება არ არის,“ – გვითხრა ზაირა მელაძემ.
მას შემდეგ, რაც ვუთხარით, რომ „ბათუმელებმა“ პირადად გადაამოწმა და აფთიაქში არ ჰქონდათ არც ინსულ-ლანტუსი და არც ინსულ-აპიდრა, ზაირა მელაძემ გვითხრა, რომ ალბათ მარაგს ახარისხებენ.
„პროგრამულად მე პრობლემა არ მაქვს არც ერთ აფთიაქში. მარაგი მიღებულია. ახარისხებენ, მე როგორც მითხრეს. უკვე შემოსულია, აფთიაქში დევს. მაგრამ დახარისხება ხომ უნდა. ჩემი კომპეტენცია არ არის აფთიაქთან ურთიერთობა. მე ვიცი, რომ სახელმწიფო მუშაობს ამ მიმართულებით და შეფერხება არ აქვს,“ – გვითხრა ზაირა მელაძემ.
„ბათუმელები“ დაუკავშირდა საქართველოს ჯანდაცვის სამინისტროსაც. სამინისტროს პრესსამსახურმა გვაცნობა, რომ დღეს, 21 მარტს, დღის მეორე ნახევარში შეფერხება აღმოფხვრილია და პაციენტებს უკვე შეუძლიათ კუთვნილი მედიკამენტების მიღება.
