მთავარი,სიახლეები,სპორტი

„ამ გამარჯვებას გარდაცვლილ მწვრთნელს ვუძღვნი“ – ბათუმელი სპორტსმენი ევროპის ჩემპიონი გახდა

18.03.2023 • 2190
„ამ გამარჯვებას გარდაცვლილ მწვრთნელს ვუძღვნი“ – ბათუმელი სპორტსმენი ევროპის ჩემპიონი გახდა

21 წლის სპორტსმენი, დიეგო ჩხიკვაძე, ევროპის ჩემპიონი გახდა ბერძნულ-რომაულ ჭიდაობაში. მან 2023 წლის 15 მარტს რუმინეთში, ბუდაპეშტში გამართულ ევროპის ჩემპიონატზე, 23 წლამდელ მოჭიდავეთა შორის დაიკავა პირველი ადგილი 67 კილოგრამ წონით კატეგორიაში.

დიეგო ამბობს, რომ წარმატებას მის პირველ მწვრთნელს, ლევან შავაძეს უძღვნის, რომელიც ყველაზე დიდ მხარდაჭერას უცხადებდა და კვარცხლბეკზეც ის მაისური ჩაიცვა, რომელზეც მწვრთნელის ფოტო წინასწარ დაბეჭდა.

დიეგო ჩხიკვაძე კვარცხლბეკზე. ფოტო: uww.org

ახალგაზრდა სპორტსმენს ამ წარმატებამდე ბევრი წინააღმდეგობა შეხვდა. იგი  იძულებული გახდა ერთი წლით სპორტს ჩამოშორებოდა და თავი დაენებებინა ვარჯიშისთვის ტრავმის გამო.

„ვარჯიში 12 წლის ასაკში დავიწყე ბათუმში. ჩემი პირველი მწვრთნელი ლევან შავაძე იყო. მქონდა სხვადასხვა წარმატება და მოვხვდი საქართველოს ეროვნულ ნაკრებშიც“, – ამბობს დიეგო. მისი თქმით, უფრო და უფრო ეზრდებოდა მოტივაცია მომდევნო ტურნირებში უკეთ ეასპარეზა, მეტად მობილიზებული გახდა და სპორტმა კიდევ უფრო დიდი მნიშვნელობა შეიძინა მის ცხოვრებაში.

„ევროპის ჩემპიონატი რამდენჯერმე მაქვს მოგებული, თუმცა ყველაზე მნიშვნელოვანი 2021 წელს მოგებული ჩემპიონატი იყო ჩემთვის.

2020 წელს, საქართველოს ჩემპიონატისთვის მზადებისას, მივიღე წელის ტრავმა, რის გამოც, თითქმის 1 წლის განმავლობაში გამოვეთიშე სპორტულ აქტიურობას, მძიმე ტრავმა მქონდა.

როცა ტკივილი გაუსაძლისი გახდა, ოპერაცია დავგეგმე, სხვა გამოსავალს ვეღარ ვხედავდი. ნაკრების ექიმმა დამირეკა და ოპერაციის ჩატარება გადამაფიქრებინა. მირჩია, კიდევ გამეგრძელებინა მკურნალობა, რადგან ისეთი ტრავმა მქონდა, გრძელვადიანი მკურნალობა მჭირდებოდა უკეთესი შედეგისთვის.

ხანგრძლივი, ერთწლიანი მკურნალობის ეტაპი იყო, უამრავი რამ, ფიზიოთერაპია, სამკურნალო ვარჯიში, ელექტროსიმულაციები და ა.შ.

ამ ყველაფერს ემატებოდა კოვიდით გამოწვეული სოციალური პრობლემები. კიდევ უფრო რთული ხდებოდა ექიმებთან კომუნიკაცია, ქალაქებს შორის გადაადგილება და ა.შ. ამ პერიოდში აბსოლუტურად გამოვეთიშე სპორტს.

რთული პერიოდი მქონდა და მის გადალახვაში ბევრი დამეხმარა. დიდი მხარდაჭერა მქონდა პირველი მწვრთნელისგან, ლევან შავაძისგან, რომელსაც ბოლომდე სჯეროდა, რომ შევძლებდი ამ ყველაფრის უკან მოტოვებას და ისევ გავაგრძელებდი სპორტულ კარიერას, გვერდში მედგნენ ოჯახის წევრებიც“, – გვიყვება დიეგო.

ის ფიზიოთერაპიის ბოლო კურსს გადიოდა 2020 წელს, როცა მისი მწვრთნელი, საქართველოს დამსახურებული მწვრთნელის სტატუსის მფლობელი ლევან შავაძე კოვიდით გარდაიცვალა და დიეგოს ვარჯიშის განახლება ინდივიდუალურად მოუწია, შემდეგ კი ახალგაზრდა მწვრთნელები ეხმარებოდნენ.

„ჩემთვის რთული იყო ერთწლიანი წყვეტის შემდეგ ისევ დავბრუნებოდი სისტემატურ ვარჯიშს. ძალიან მსუბუქი ფიზიკური ვარჯიშებით მომიწია დაწყება. მეშინოდა, რომ ტრავმა ისევ განმეორდებოდა და ბევრი სხვადასხვა მოძრაობისგან თავს ვიკავებდი. იყო მოძრაობები, რის დროსაც ზურგის ტკივილი ისევ მქონდა. მეტი ფიზიკური მომზადება და დრო მჭირდებოდა, რათა აღარ მქონოდა ტკივილი და თამამი ვყოფილიყავი ჭიდაობის დროს. თავისუფლად გამერისკა იმ მოძრაობების გაკეთება, რაც ზუსტად ვიცოდი, რომ გამომივიდოდა.

დიეგო ჩხიკვაძემ ფინალში თურქ სპორტსმენს სძლია

ამ წლის ევროპის ჩემპიონატისთვის რამდენიმე თვის განმავლობაში ვემზადებოდით. მიზანი, რა თქმა უნდა, ოქროს მედალი იყო, რათა დამემტკიცებინა, რომ ჩვენ კვლავ შევძლებდით ამ სპორტში წარმატების მიღწევას და გავამართლებდი ჩვენი მწვრთნელის, ლევან შავაძის იმედებს. ის ძალიან დაგვაკლდა ჩვენს სპორტულ ცხოვრებაში“, – ამბობს დიეგო.

გადაბეჭდვის წესი


ასევე: