უკრაინის საგარეო საქმეთა მინისტრმა, დმიტრო კულებამ საქართველოში უკრაინის ელჩის დანიშვნაზე და ორ ქვეყანას შორის ურთიერთობებზე ისაუბრა ეროვნული ტელემარათონის ეთერში – ინფორმაციას და კულებას ციტატას აღნიშნულ თემაზე უკრაინული გამოცემა 24tv.ua ავრცელებს.
კულებას თქმით, საქართველოში უკრაინის ელჩის დანიშვნის პროცესი უკვე დასკვნით ეტაპზეა, თუმცა როდის წავა დიპლომატი საქართველოში, ეს უკვე პოლიტიკური საკითხია.
გამოცემა წერს, რომ კულებას თქმით, კიევი თბილისთან მჭიდრო დიპლომატიური კავშირების დამყარებას ცდილობს.
„ჩვენ არაფერი გაგვიკეთებია. თითი არ გაგვიქანებია საქართველოსთან ურთიერთობის გასაფუჭებლად. პირიქით, ჩვენ ბევრი ინვესტიცია ჩავდეთ, რომ ჩვენი ურთიერთობები განვითარებულიყო“, – განაცხადა კულებამ.
თუმცა მან დასძინა, რომ მიუხედავად იმისა, ქართველი და უკრაინელი ხალხების ურთიერთობა მეგობრულია, იმავეს ვერ იტყვის საქართველოს მთავრობასთან ურთიერთობაზე. ამის მიზეზი კი მიხეილ სააკაშვილის საქმეა, რომელსაც, როგორც კულება ამბობს, „უბრალოდ კლავენ“.
კულებამ თქვა, რომ დაიცავს სააკაშვილის, ისევე როგორც სხვა ადამიანების უფლებებს, რომელთაც უკრაინული პასპორტი აქვთ.
„საქართველოს ხელისუფლება ნელ-ნელა კლავს უკრაინის მოქალაქე მიხეილ სააკაშვილს. მასზე, როგორც პოლიტიკოსზე, შეუძლიათ იფიქრონ რაც უნდათ, მაგრამ ჩემთვის, როგორც საგარეო საქმეთა სამინისტროს ხელმძღვანელისთვის, ის უკრაინის მოქალაქეა. მე ვიბრძოლებ მისთვის“, – განაცხადა კულებამ.
მან ასევე აღნიშნა, რომ არის კითხვები და პრობლემები საქართველოს ხელისუფლებასა და რუსეთს შორის ურთიერთობასთან დაკავშირებით, თუმცა კიევს აქვს საკმარისი ურთიერთობა თბილისთან, რათა შეინარჩუნოს კონტაქტი და შეეცადოს ამ პრობლემების მოგვარებას.
