„ტოიოტა ცენტრი ბათუმმა“ „ოცნების ავტომობილის” ხატვის კონკურსის გამარჯვებულები დააჯილდოვა. გლობალურ კონკურსში დასავლეთ საქართველოდან 16 წლამდე ასაკის 100-ზე მეტი ბავშვი ჩაერთო და მათ შორის საუკეთესოები სამ ასაკობრივ კატეგორიაში გამოვლინდნენ. „ტოიოტა ცენტრი ბათუმის“ შოურუმში გამართულ დაჯილდოებაზე 9 გამარჯვებული დასახელდა, რომელთა ნამუშევრებს ახლა უკვე საერთაშორისო კონკურსზე, იაპონიაში შეაფასებენ.
ადგილობრივი კონკურსის გამარჯვებულები 12-15 წლის ასაკობრივი კატეგორიიდან არიან ელიზა სამუილოვა, ქეთევან ძოძუაშვილი და სალომე ჯავახიშვილი; 8-11 წლის ასაკობრივი კატეგორიიდან – ელენე ზარია, ელენე ჯანაშია და გიორგი გელაშვილი; ხოლო 7 წლამდე ასაკობრივი კატეგორიიდან – ათუკა შაშიკაძე, მელისა ბოლქვაძე და სესილი ზაქარაძე.
გლობალურ კონკურსში „ტოიოტა ცენტრი ბათუმი“ წელს პირველად ჩაერთო და ბავშვებს საკუთარი თავის გამოხატვისა და მსოფლიოსთვის თავიანთი „ოცნების ავტომობილის“ გაზიარების შესაძლებლობა მისცა.
პაატა დუმბაძე, „ტოიოტა ცენტრი ბათუმის“ დირექტორი: „მოხარულები ვართ, რომ შევუერთდით ტოიოტას გლობალურ კონკურსს და ქართველ ბავშვებს საკუთარი ფანტაზიის ფურცელზე გაცოცხლების შესაძლებლობა მივეცით. გვიხარია, რომ „ტოიოტა ცენტრი ბათუმის“ მხარდაჭერით დასავლეთ საქართველოში მცხოვრებ ახალგაზრდებს კონკურსში მონაწილეობის შესაძლებლობა გაუჩნდათ. ახლა მათ ნამუშევრებს იაპონიაში გავგზავნით და იმედი მაქვს, რომ საქართველოს სახელით გამარჯვებას იქაც მოვიპოვებთ“.
კონკურსის დაჯილდოების ცერემონიის ფარგლებში, „ტოიოტა ცენტრი ბათუმის“ შოურუმში ნახატების გამოფენა მოეწყო და ახალგაზრდა მხატვრების გართობაზე ანიმატორებმა იზრუნეს. გამარჯვებულებს, სერტიფიკატებთან ერთად, მათი ინტერესებისა და სურვილების მიხედვით შერჩეული საჩუქრებიც გადაეცათ.
ტოიოტას ხატვის გლობალური კონკურსი ყოველწლიურად იმართება და მასში მსოფლიოს 100-ამდე ქვეყანა მონაწილეობს. საქართველო უკვე მეთექვსმეტე წელია ტრადიციულად უერთდება კონკურსს, თუმცა „ტოიოტა ცენტრი ბათუმი“ წელს პირველად ჩაერთო. კომპანიაში აცხადებენ, რომ კონკურსს არც მომავალში გამოტოვებენ, რადგან მიზანი ერთია, ქართველ ბავშვებს მეტი შესაძლებლობა ჰქონდეთ, მსოფლიოს თავიანთი ოცნებები და უნიკალური ხედვა გაუზიარონ.
