ბათუმის ავტოტრანსპორტის ცნობით, 60 ახალი ავტობუსის ეტაპობრივი მოწოდება ბათუმში მიმდინარე კვირის ბოლოდან დაიწყება. საწყის ეტაპზე ქალაქში 18 ახალი, 10 მეტრი სიგრძის ავტობუსი ჩამოვა, რომლებიც სამარშრუტო ხაზებზე მარტიდან იმოძრავებენ.
ბათუმი 2023 წელს 65 ახალ ავტობუსს იყიდის, თუმცა მერიის განცხადებით, აქედან ქალაქში მხოლოდ 60 ავტობუსი იმოძრავებს. „ბათუმელების“ ინფორმაციით 5 ახალი ავტობუსი აჭარაში, ერთ-ერთ მუნიციპალიტეტს გადაეცემა, სავარაუდოდ, ეს მუნიციპალიტეტი ქობულეთი იქნება.
ავტოპარკის განახლების პროცესი აპრილის თვეში დასრულდება. ISUZU-ს ფირმის ახალი ავტობუსები სრულად ჩაანაცვლებს Zonda–ს [ყვითელი] მარკის მოძველებულ ტრანსპორტს.
ახალი ავტობუსები გათვლილი იქნება 70 მგზავრზე და ადაპტირებულია შშმ პირთათვის. ავტობუსებში ინტეგრირებულია გათბობის, კონდიცირების, ვენტილაციის, საინფორმაციო ხმოვანი და ვიდეომონიტორინგის სისტემები.
საერთო ჯამში ძველ ავტობუსებს ახლებით შემდეგ შვიდ სამარშრუტო ხაზზე ჩაანაცვლებენ:
- #2 [ადლიის ქ. – ახალშენის ცენტრი]
- #2ა [ახალშენის ცენტრი-ადლიის ქ]
- #4 [აღმაშენებლის ქ – სვიშევსკის ქ]
- #8 [აღმაშენებლის ქ – მახინჯაური]
- #9 [ქათამაძის ქ – ივანე მესხის ქ]
- #11 [აღმაშენებლის ქ. – ფერიის ქ.]
- #12ა [მაიაკოვსკის ქ. – მახოს ხიდი]
ბათუმის მერია ამ ეტაპზე 65 ავტობუსს ჯამში 34 879 000 ლარად იყიდის.
————————————
ფოტო: ბათუმის ავტოტრასპორტი.
ამავე თემაზე:
სიცხე და გადაჭედილი მუნიციპალური ტრანსპორტი ბათუმში – როდის იყიდის მერია ახალ ავტობუსებს
