გაერთიანებული სამეფოს დაზვერვის 16 თებერვლის ანგარიში რუსეთის საჰაერო-კოსმოსური ძალების აქტივობას მიმოიხილავს. ანგარიშის თანახმად, ოკუპანტი ქვეყნის საჰაერო ძალები კვლავაც იმავე რაოდენობის საფრენ აპარატებს იყენებს უკრაინის ოპერაციებში, რამდენსაც მრავალი თვის განმავლობაში იყენებდა.
თუმცა ბოლო კვირის განმავლობაში, რამდენიმეკვირიანი შედარებით დაბალი აქტივობის შემდეგ, გაფრენების რაოდენობა გაიზარდა.
ბრიტანეთის დაზვერვის მონაცემების თანახმად, რუსეთის საჰაერო აქტივობა ახლა 2022 წლის ზაფხულის შემდგომ დაფიქსირებულ ყოველდღიურ საშუალო რაოდენობასთანაა მიახლოებული.
საერთო ჯამში, უწყების ანალიტიკოსების შეფასებით, რუსეთის საჰაერო ძალები კვლავაც მნიშვნელოვნად შეზღუდულ როლს ასრულებენ ომში, რადგანაც უკრაინის საჰაერო თავდაცვა მუდმივად დიდ საფრთხეს უქმნის მათ ჰაერში. საჰაერო თავდასხმების რისკების გამო ასევე გაფანტულია რუსეთის საჰაერო ბაზებიც.
როგორც გაერთიანებული სამეფოს დაზვერვის ანგარიში იუწყება, რუსული საბრძოლო თვითმფრინავები მოქმედებენ თითქმის ექსკლუზიურად, მხოლოდ რუსეთის მიერ დაპყრობილ ტერიტორიაზე. ეს მათ ხელს უშლის ეფექტურად შეასრულონ მთავარი დამრტყმელი როლი.
საბოლოოდ, ბრიტანეთის დაზვერვის შეფასებით, ნაკლებად მოსალოდნელია, რუსეთის საჰაერო-კოსმოსური ძალები ოპერაციების დრამატული გაფართოებისთვის ემზადებოდეს. უწყების შეფასებით, ამჟამად ბრძოლის ველზე არსებულ პირობებში მოსალოდნელია, რომ მას თვითმფრინავების არამდგრადი დანაკარგები მიადგება.
