შუახევის მუნიციპალიტეტის საკუთრებაში არსებული ავტომანქანა „ტოიოტა პრადო“ [სახ. ნომრით DCD-878] ამჟამად დაშლილ მდგომარეობაში დგას ქ. ქობულეთში, „ტოიოტა ცენტრი ჯორჯიას“ აჭარის სერვისცენტრში. გამგეობის ინფორმაციით, ავტომანქანა გაფუჭდა თბილისიდან გზად მომავალი და აუცილებელი იყო მისი ევაკუატორით გადაყვანა.
„აღნიშნული კომპანიის დახმარებით მოხდა მანქანის ქობულეთამდე ტრანსპორტირება და დაშლა დიაგნოსტიკის მიზნით. ავტომანქანის შესაკეთებლად საჭიროა 2720 ლარი. მანქანის ძრავი არის დაშლილი და დიდი ალბათობით, ტენდერის გამოცხადების შემთხვევაში თუ სხვა მიმწოდებელი მიიღებს მონაწილეობას, შეუძლებელი იქნება მისი შეკეთება [სირთულის გამო]“, – აცხადებენ მუნიციპალიტეტში.
შესაბამისად, შუახევის მუნიციპალიტეტის გამგებელმა ტარიელ ებრალიძემ გამოსცა ბრძანება მომსახურების გამარტივებული წესით შესყიდვაზე, რაც კანონმდებლობის თანახმად, შესყიდვების სააგენტოსთან შეთანხმებას საჭიროებს. სააგენტოს კი გადაწყვეტილების მისაღებად ვადა 30 მაისამდე აქვს.
ინვოისი
„ავტომანქანა შუახევის მუნიციპალიტეტის საკრებულოს თავმჯდომარის სამსახურებრივ სარგებლობაშია, რომლითაც ხშირად უხდება გასვლა მუნიციპალიტეტის სხვადასხვა სოფელში. გარდა საკრებულოს თავმჯდომარისა, აღნიშნული ავტომანქანით სარგებლობენ საკრებულოს სხვადასხვა კომისიები და სამუშაო ჯგუფები. შეკეთების მომსახურების შესასყიდად ტენდერის ჩატარება მოითხოვს გარკვეულ დროს, რაც სარეზერვო ავტომანქანების მცირე რაოდენობის გამო შეაფერხებს საკრებულოს თანამშრომლების მუშაობას, აღნიშნული კი უარყოფითად აისახება მუნიციპალიტეტში განსახორციელებელ სხვადასხვა საზოგადოებრივი მნიშვნელობის ღონისძიებაზე. ტენდერის შემთხვევაში მომსახურების მოცულობა შესაძლებელია ნაკლები იყოს, მაგრამ გვაქვს გამოუვალი მდგომარეობა,“ – აცხადებენ შუახევის მუნიციპალიტეტში.
