გაერთიანებული სამეფოს დაზვერვის 31 იანვრის ანგარიში უკრაინაში, დონეცკის ოლქის ქალაქებთან – პავლივკასა და ვუჰლედართან განვითარებული სამხედრო მოქმედებების მიმოხილვას ეთმობა. როგორც უწყება 27 იანვრის ანგარიშში წერდა, ამ მიმართულებით გარღვევის მიღწევაზე რუსი კომენტატორების მიერ გავრცელებული ცნობები დეზინფორმაციას წარმოადგენდა, ხოლო სინამდვილეში, რუსული ძალები მხოლოდ საცდელ შეტევებს ახორციელებდნენ, რაც ნაკლებად სავარაუდო იყო რეალურ წინსვლაში გადაზრდილიყო.
ამჯერად, ბრიტანული დაზვერვა იუწყება, რომ ბოლო სამი დღის განმავლობაში, სავარაუდოდ, რუსეთმა პავლივკასა და ვუჰლედარის ირგვლივ შეტევები შედარებით ორგანიზებულ თავდასხმებამდე განავითარა.
აღნიშნული დასახლებები ქალაქ დონეცკიდან სამხრეთ-დასავლეთით 50 კილომეტრში მდებარეობს და აქ, რუსეთი 155-ე საზღვაო ქვეითი ბრიგადას იყენებდა 2022 წლის ნოემბერში წარუმატებელი შეტევის დროს.
როგორც გაერთიანებული სამეფოს დაზვერვის ანგარიშში ვკითხულობთ, ამ ბრიგადის ნაწილმა რამდენიმე ასეული მეტრით წაიწია წინ მდინარე კაშლაჰაჩის მიღმა. ეს მდინარე, დაზვერვის ცნობით, რამდენიმე თვის განმავლობაში აღნიშნავდა ფრონტის ხაზს.
ბრიტანული დაზვერვის შეფასებით, რუსი მეთაურები, სავარაუდოდ, მიზნად ისახავენ უკრაინის მიერ კონტროლირებად დონეცკის ოლქში ახალი მიმართულების განვითარებასა და უკრაინის ძალების ბახმუტიდან იქ გადატანას.
„არსებობს რეალური შესაძლებლობა, რომ რუსეთი განაგრძობს ლოკალური უპირატესობის მიღწევას ამ სექტორში. თუმცა, ნაკლებად სავარაუდოა, რომ რუსეთს ამ ტერიტორიაზე გააჩნდეს საკმარისი რაოდენობის თავისუფალი სამხედროები ოპერატიულად მნიშვნელოვანი გარღვევის მისაღწევად“, – ვკითხულობთ გაერთიანებული სამეფოს დაზვერვის 31 იანვრის ანგარიშში.
