ომის შემსწავლელი ინსტიტუტი ISW-ი ახალ, 29 იანვრის ანგარიშში წერს, რომ დასავლეთიდან მრავალჯერადი სარაკეტო სისტემების, საჰაერო თავდაცვის სისტემებისა და ტანკების უკრაინისთვის მიწოდების შეფერხებამ შეზღუდა უკრაინის შესაძლებლობა, განახორციელოს უფრო დიდი კონტრშეტევა რუსული სამხედრო წარუმატებლობის ფონზე.
ISW-ი, ფაქტობრივად, არ აფასებს უკრაინის სამხედრო გადაწყვეტილებებს, თუმცა, როგორც ისტორიკოსებს, ჩვენ არ გვინახავს უნაკლო სამხედრო გადაწყვეტილება არც ერთ ომში, მაგრამ უკრაინას არ გააჩნია მნიშვნელოვანი სამხედრო ინდუსტრია, რომელსაც გამოიყენებდა დასავლეთის მხარდაჭერის არარსებობის შემთხვევაში – წერს ISW-ი.
ISW-ის ექსპერტების აზრით, რუსეთის ჯარებს ჰქონდათ ინიციატივა 2022 წლის 24 თებერვლიდან 3 ივლისის ჩათვლით, რის შემდეგაც უკრაინელებმა აიღეს ინიციატივა და აგვისტოში წამოიწყეს ფართომასშტაბიანი კონტრშეტევა, რის შედეგადაც 11 ნოემბერს ხერსონის ოლქის დასავლეთი ნაწილი გაათავისუფლეს.
ექსპერტები მიიჩნევენ, რომ მას შემდეგ უკრაინამ ვერ შეძლო ახალი ძირითადი კონტრშეტევის წამოწყება, რამაც რუსებს შესაძლებლობა მისცა, დაიბრუნონ ინიციატივა მომავალი კონტრშეტევისთვის.
ანგარიშში ღია წყაროებზე დაყრდნობით აღნიშნულია, რომ გასულ დღეებში უკრაინული ძალები აგრძელებდნენ კონტრშეტევას კუზემივკას მახლობლად (სვატოვიდან ჩრდილო-დასავლეთით დაახლოებით 16 კმ) და რუსეთის შეზღუდული კონტრშეტევების მოგერიებას კრემინას დასავლეთით და სამხრეთით.
„ვაგნერის“ ფინანსისტმა ევგენი პრიგოჟინმა გამოაცხადა, რომ „ვაგნერმა“ 29 იანვარს დაიპყრო სოფელი ბლაჰოდატნე, ასევე, რუსული ძალები აგრძელებენ სახმელეთო შეტევებს ბახმუტისა და დონეცკის ქალაქ ავდიივკას მახლობლად.
ანგარიშში ასევე აღნიშნულია, რომ რუსეთის ხელისუფლება აგრძელებს მობილიზაციის მეორე ტალღისთვის შესაბამისი პირობების შექმნას.
