მთავარი,სიახლეები

დნიპროს მერის განცხადების შემდეგ ქუთაისის მერია დნიპროსთვის გენერატორს შეიძენს

25.01.2023 • 1012
დნიპროს მერის განცხადების შემდეგ ქუთაისის მერია დნიპროსთვის გენერატორს შეიძენს

დნიპროს მერის მიმართვიდან 5 დღის შემდეგ ქუთაისის მერია ქალაქ დნიპროს გენერატორს გაუგზავნის. ინფორმაცია ამის შესახებ ქუთაისის მერმა, იოსებ ხახალეიშვილმა საკუთარ ფეისბუქგვერდზე გამოაქვეყნა.

“იმის გათვალისწინებით, რომ უკრაინის მხრიდან იყო თხოვნა გენერატორებით დახმარებისა, ქუთაისის მერია შეიძენს გენერატორს, რომელიც უახლოეს პერიოდში გაიგზავნება დამეგობრებულ ქალაქ დნიპროში,” – წერს იოსებ ხახალეიშვილი ფეისბუქზე.

როგორც „ბათუმელებს“ ქუთაისის მერიაში დაუზუსტეს მერია უკრაინაში გასაგზავნად ერთ ცალ მაღალი სიმძლავრის გენერატორს შეიძენს.

20 იანვარს ტელეკომპანია „ფორმულასთვის“ მიცემულ ინტერვიუში უკრაინის ქალაქ დნიპროს მერმა, ბორის ფილატოვმა თქვა, რომ ომის შემდეგ ქუთაისთან, რომელიც დნიპროსთან დაძმობილებული ქალაქია, კავშირი გაწყდა.

ფილატოვის თქმით, მაშინ, როცა სხვა დაძმობილებული ქალაქები დახმარებას სთავაზობენ, ქუთაისიდან მათ არავინ დაჰკავშირებია.

„სამწუხაროდ, ომის დროს ჩვენ მოძმე ქალაქთან, ქუთაისთან კავშირი დავკარგეთ. ქუთაისს თუ ესმის, ჩვენ შეგვიძლია მივიღოთ ნებისმიერი დახმარება ადამიანებისთვის, ქუთაისის მხრიდან“, – თქვა ფილატოვმა.

დნიპროს მერის განცხადებიდან მალევე ქუთაისში ადგილობრივი ხელისუფლებისგან დამოუკიდებლად საინიციატივო ჯგუფი შეიქმნა, დაბომბილი ქალაქის დასახმარებლად.

საინიციატივო ჯგუფის წევრებმა, რომელშიც ქუთაისში მოქმედი არასამთავრობო სექტორის წარმომადგენლები და აქტივისტები შედიან, 23 იანვარს გამართეს შეხვედრა უკრაინულ მხარესთან.

საინიციატივო ჯგუფის ინფორმაციით, ფორმალური საკითხების გავლის შემდეგ გამოაქვეყნებენ ანგარიშის ნომერს, სადაც მოქალაქეები თანხას ჩარიცხავენ და ეს თანხა საბოლოოდ ქალაქ დნიპროს შესაბამის ფონდს გადაეცემა.

საინიციატივო ჯგუფის ონლაინ შეხვედრა უკრაინულ მხარესთან

დღეს, 25 იანვარს ქუთაისის მერმა ვრცელი განცხადება გამოაქვეყნა, სადაც წერს, რომ ქუთაისის მუნიციპალიტეტი ომის დაწყების პირველივე დღიდან ეხმარებოდა უკრაინას. ქუთაისში შეგროვდა ჰუმანიტარული ტვირთი, ხოლო სპეციალურ ანგარიშზე, სადაც უკრაინისთვის თანხა გროვდებოდა, ქუთაისის მერიამ 50 ათასი ლარი ჩარიცხა. ქუთაისის მერი ასევე წერს, რომ მერია ეხმარება ქუთაისში ჩამოსულ უკრაინის მოქალაქეებს.

„ადგილობრივი ხელისუფლება მზადაა, შესაძლებლობების ფარგლებში, კვლავ დაეხმაროს ომში მყოფ მეგობარ ქვეყანას,“- ვკითხულობთ ხახალეიშვილის ფეისბუქ-პოსტში.

  • რა მოხდა

14 იანვარს რუსეთმა მორიგი სარაკეტო იერიში მიიტანა უკრაინაზე. დაიბომბა კიევის, ლვოვი, ხარკოვისა და დნეპროპეტროვსკის რეგიონები. ყველაზე დიდი ზიანი ქალაქ დნიპროს მიადგა, სადაც რაკეტა 9-სართულიანი საცხოვრებელ სახლს მოხვდა. შედეგად 44 ადამიანი დაიღუპა, მათ შორის 5 ბავშვი.

20 იანვარს ტელეკომპანია „ფორმულამ“ დნიპროს მერი ბორის ფილატოვი ჩაწერა, რომელმაც თქვა, რომ მაშინ როცა დაძმობილებული ქალაქები, კიოლნი, ოსაკა და ჟილინა დაბომბილ ქალაქს დახმარებას სთავაზობენ, ქუთაისიდან მათი დახმარების სურვილი არავის გამოუთქვამს.

გადაბეჭდვის წესი


ასევე: