ჩინეთის ქალაქი მოხე ისტორიულად ძლიერი ყინვის მოწმეა. ადგილობრივი მეტეოროლოგიური სადგურის ინფორმაციით, ჩინეთის უკიდურეს ჩრდილოეთში, რუსეთის საზღვართან მდებარე ქალაქ მოხეში, 22 იანვარს, დილის 7 საათზე, ჰაერის რეკორდულად დაბალი ტემპერატურა, -53 გრადუსი დაფიქსირდა.
ჩინური მედიის ცნობით, „ჩინეთის ჩრდილოეთ პოლუსად“ წოდებულ ქალაქში ჰაერის ტემპერატურა წლის ამ დროს, ჩვეულებრივ, დაახლოებით -15 გრადუსია. წელს დაფიქსირებული რეკორდული მაჩვენებელი კი რამდენიმე მეათედი გრადუსით ჩამორჩება წინა რეკორდს, 1969 წელს დაფიქსირებულ -52.3 გრადუსს.
22 იანვარს მოხეს მეტეოროლოგიური სადგურის დირექტორმა, მთავარმა ინჟინერმა, სუ ლილინმა, ჩინურ მედიასთან საუბარში განაცხადა, რომ ჰაერის ტემპერატურის ვარდნა -50 გრადუსზე დაბლა სამი დღის განმავლობაში გაგრძელდა, რეკორდულ მაჩვენებლამდე, რაც გამოწვეული იყო სუპერ ძლიერი პოლარული ცივი ჰაერის მასებით. ტემპერატურამ მას შემდეგ მოიმატა და სუს თქმით, ეს მატება მომდევნო დღეებშიც გაგრძელდება, თუმცა -40 გრადუსზე მაღლა არ აიწევს.
ჩინელმა ჟურნალისტმა პირდაპირი ჩართვისას იმის საჩვენებლად, თუ რამდენად დაბალია ტემპერატურა მოხეში, კვერცხი გატეხა, რომელიც ზედაპირთან შეხებისთანავე გაიყინა. ფოტო: კადრი CCTV-ის პირდაპირი ეთერიდან
ჩინური გამოცემა „ჩაინა დეილის“ ინფორმაციით, მოხე ქვეყნის ყველაზე ცივ ქალაქად მიიჩნევა, სადაც ზამთარი 8 თვე გრძელდება. ეს ქალაქი ხშირი მასპინძელია ზამთრის სპორტის ჩემპიონატების.
BBC-ის ცნობით, ჩინეთში ჰაერის ყველაზე დაბალი ტემპერატურა -58 გრადუსი 2009 წლის დეკემბერში ქალაქ გენხეში დაფიქსირდა.
დაბალმა ტემპერატურამ ხილვადობა გაართულა. ფოტო: კადრი Xinhua New-ის რეპორტაჟიდან
როგორც ჩინური მედია იუწყება, ტემპერატურის ვარდნამ გამოიწვია ხილვადობის გაუარესება – ყინვა და ნისლი, რის გამოც ქალაქში დამატებითი ზომებია მიღებული.
დაბალმა ტემპერატურამ ხილვადობა გაართულა. ფოტო: კადრი CCTV-ის რეპორტაჟიდან
ტემპერატურის რეკორდული ვარდნა შეინიშნება ჩინეთის სხვა რეგიონებშიც. მეტეოროლოგები ჰაერის ტემპერატურის ვარდნას ერთი კვირით ადრე აანონსებდნენ.
წყლის წვეთები ჰაერთა შეხებისას ფიფქებად იქცევა; კადრი Xinhua News-ის რეპორტაჟიდან
ტურისტები და ადგილობრივები ჰყვებიან, რომ ყინვა იმდენად ძლიერია, გარეთ გასვლისას ადამიანებს თითები რამდენიმე წუთით უბუჟდებათ.
_____
მთავარი ფოტო: მოხე, ჩინეთი. კადრები Xinhua News-ის რეპორტაჟიდან
