ქობულეთში გასული წლის 10 მაისს ხანძრის შედეგად გარდაცვლილი ბავშვების საქმეზე ბრალდების მხარის მოწმეები იკითხებიან. პროკურატურა სასტუმრო „არმაზის“ მფლობელს, ზაზა ართმელაძეს უსაფრთხოების წესების დარღვევას ედავება, რამაც პირთა სიცოცხლის მოსპობა გამოიწვია.
„რატომ დაკითხეთ მოწმეები ღამის საათებში“? – ეს შეკითხვა დაცვის მხარის ადვოკატებმა თითქმის ყველა პოლიციელს დაუსვეს, ვინც დღეს სასამართლოს ჩვენება მისცა. პოლიციელები და დეტექტივ-გამომძიებლები განმარტავენ, რომ გვიან ღამით ადამიანები გადაუდებელი აუცილებლობის გამო დაკითხეს.
„რა აუცილებლობა იყო ღამით დაკითხულიყო, მაგალითად, სასტუმროს დამლაგებელი, რომელიც ქობულეთში ცხოვრობს“? – კითხა მოწმე პოლიციელს, ომარ გოგმაჩაძეს ადვოკატმა ტარიელ კაკაბაძემ. პოლიციელის განმარტებით, ტრაგიკული შემთხვევის გამო, თავად მიიღო ასეთი გადაწყვეტილება.
ზაზა ართმელაძის ადვოკატების მტკიცებით, მოწმეთა ჩვენებების დიდი ნაწილი კანონდარღვევით არის მოპოვებული, რის გამოც იგი არ უნდა გაიზიაროს მოსამართლემ.
მოწმე სამართალდამცველებმა აღწერეს, რა ინფორმაცია მიიღეს დაკითხული ადამიანებისგან. გამომძიებელ ოლეგ გოგიტიძის თქმით, მან ელექტროსადენებიც ამოიღო სასტუმროს მესამე სართულიდან, სადაც გარდაცვლილი ბავშვები იპოვეს.
2015 წლის 10 მაისს, ქობულეთში, სასტუმრო „არმაზში“ გაჩენილ ხანძარს რუსთავის ქორეოგრაფიული ანსამბლ „სიხარული 2“-ის წევრი სამი მოზარდის სიცოცხლე ემსხვერპლა. ბრალდებული ზაზა ართმელაძე მოსამართლე ირაკლი შავაძემ წინა სასამართლო სხდომაზე წინასწარი პატიმრობიდან გაათავისუფლა.
