გაერთიანებული სამეფოს დაზვერვის 13 იანვრის ანგარიშში ომის დროს წარმოებაზე გაზრდილი მოთხოვნის დასაკმაყოფილებლად რუსეთის მიერ პატიმართა შრომის გამოყენებაა განხილული. როგორც ანგარიშში ვკითხულობთ, დიდი ალბათობით, რუსეთის თავდაცვის [შეიარაღების] საწარმოო სექტორი სწორედ პატიმართა შრომას იყენებს.
ბრიტანული დაზვერვა 2022 წლის ნოემბერში, რუსეთის ტანკების უმსხვილესი საწარმოს – ურალვაგონზავოდის [UVZ] წარმომადგენლის განცხადებას იშველიებს. მაშინ საწარმოს ხელმძღვანელობამ ფედერალურ სასჯელაღსრულების სამსახურთან (FSIN) შეხვედრის შემდეგ განაცხადა, რომ საწარმო 250 პატიმარს დაასაქმებდა.
გაერთიანებული სამეფოს დაზვერვის სამსახურის სპეციალისტები აღნიშნავენ, რომ პატიმართა შრომის გამოყენება რუსეთში ხანგრძლივ ტრადიციას ეფუძნება, მაგრამ ამის მიუხედავად მნიშვნელოვანია, რომ 2017 წლიდან იძულებითი შრომა კონკრეტულ კრიმინალურ სასჯელად აღდგა.
როგორც ბრიტანული დაზვერვის ანგარიშში ვკითხულობთ, რუსეთს მსოფლიოში პატიმართა ყველაზე მაღალი მაჩვენებელი აქვს. 400 000-პატიმრიან „იმპერიას“ კი ზედამხედველობს ფედერალური სასჯელაღსრულების სამსახური, რომელსაც ხშირად ადანაშაულებენ უკიდურეს სისასტიკესა და კორუფციაში.
ბრიტანელი დაზვერვის ექსპერტების შეფასებით, პატიმართა ეს ოდენობა რუსეთის ხელმძღვანელობას უნიკალურ ადამიანურ რესურსებს სთავაზობს „სპეციალური სამხედრო ოპერაციის“ მხარდასაჭერად, მაშინ, როდესაც ჯერ კიდევ დეფიციტურია მოხალისეები, რომლებიც ომში წასვლას მოინდომებენ.
ანგარიშში ასევე აღნიშნულია, რომ მსჯავრდებულთა შრომა, სავარაუდოდ, განსაკუთრებით მოთხოვნადი იქნება შედარებით დაბალტექნოლოგიური იარაღის მწარმოებლებისთვის, როგორიცაა მაგალითად ურალვაგონზავოდი. თითქმის დარწმუნებით შეიძლება ითქვას, რომ ეს საწარმო, წარმოების გაზრდის მოთხოვნით, მოსკოვის ძლიერი ზეწოლის ქვეშ არის.
