ბათუმის მუნიციპალურ ავტობუსებში მგზავრობის საფასურის ნებისმიერი ბანკის პლასტიკური ბარათით გადახდა, სავარაუდოდ, იანვრის ბოლოდან იქნება შესაძლებელი. ამის შესახებ „ბათუმელებს“ მერიის შპს „ბათუმის ავტოტრანსპორტში“ განუცხადეს.
„მიმდინარეობს სამუშაო პროცესი. სხვადასხვა ბანკთან მოლაპარაკებებს „საქართველოს ბანკი“ აწარმოებს და ტექნიკური საკითხების მოგვარების შემდეგ, სავარაუდოდ, იანვრის თვის ბოლოს, ველოდებით, რომ გადახდა ნებისმიერი ბარათით იქნება შესაძლებელი“, – გვითხრეს ავტოტრანსპორტში.
ბათუმის მუნიციპალურ ავტობუსებში გადახდის ახალი აპარატები უკვე დამონტაჟებულია. თუმცა, ახალი აპარატებით მგზავრობის საფასურის გადახდა ისევ იმ პლასტიკური ბარათებითაა შესაძლებელი, რომლებითაც ამ დრომდე ვიხდიდით. ამ ბარათების [მათ შორის საქართველოს ბანკის ბარათების] გარდა, სხვა ქართული ბანკების პლასტიკური ბარათებით გადახდა ჯერჯერობით არ არის შესაძლებელი.
არ შეცვლილა და არც შეიცვლება მგზავრობის ფასიც და ერთი მგზავრობა 30 თეთრია. არის ერთი გამონაკლისი: ახალი აპარატებით შესაძლებელია უცხოური ბანკების ბარათებითაც გადახდა, თუმცა, მგზავრს ბარათზე 30-ის ნაცვლად 80 თეთრი ჩამოეჭრება.
გადახდის ახალი სისტემის ამოქმედების შემდეგ ძალაში დარჩება საქალაქო ავტობუსებით შეღავათიანი თუ უფასოდ მგზავრობის ის წესი, რაც დღეს მოქმედებს, შესაბამისად, იმოქმედებს ასეთი მგზავრობისთვის განკუთვნილი სპეციალური პლასტიკური ბარათებიც.
რაც შეეხება ავტოპარკს, ბათუმი 2023 წელს 65 ახალ ავტობუსს იყიდის, თუმცა, აქედან ქალაქში მხოლოდ 60 ავტობუსი იმოძრავებს, 5 ავტობუსს კი, ბათუმის მერია სავარაუდოდ, ქობულეთს გადასცემს.
ახალ ავტობუსებს ბათუმი 2023 წლის მაისამდე ეტაპობრივად მიიღებს, და ე.წ. ყვითელ ავტობუსებს ჩაანაცვლებენ.
ამავე თემაზე:
https://batumelebi.netgazeti.ge/news/455953/
