კაცი, რომელიც ბათუმში ახალი წლის ღამეს პიროტექნიკის გამოყენების შედეგად დაშავდა და გადაუდებელი ოპერაცია ჩაუტარდა, კლინიკიდან გაწერეს – ინფორმაციას ამის შესახებ საერთაშორისო ჰოსპიტალი ბაუ ავრცელებს.
ჰოსპიტლის ცნობით, 31 წლის პაციენტი მარცხენა ხელის მტევნის დაზიანებებით შეიყვანეს ჰოსპიტალში.
„აღინიშნებოდა თითების მრავლობითი მოტეხილობა, მესამე თითის ნაწილობრივი ამპუტაცია, მეორე და მეოთხე თითების ნაფლეთოვანი ჭრილობა ფრჩხილის ტრავმით, დიდი თითის გამშლელი მყესებისა და კუნთების დაზიანება.
პაციენტს ურგენტულ რეჟიმში ჩაუტარდა ოპერაცია, ექიმი-ტრავმატოლოგი – დარინა ცეცხლაძე, ექიმი-ანესთეზიოლოგი – შავლეგ კუტალაძე
ოპერაციის მსვლელობისას მოხდა ამპუტირებული თითის ტაკვის ფორმირება. შენარჩუნებულ იქნა მეორე და მესამე თითების საფრჩხილე ფალანგები. აღდგა დიდი თითის გამშლელი მყესები და კუნთები. გაიკერა შრეობრივად. კანზე დაედო კვანძოვანი ნაკერები, კიდური იმობილიზირდა თაბაშირის ლონგეტით“ – აცხადებენ ჰოსპიტალში.
საახალწლო პიროტექნიკით ბათუმში დაშავდა კიდევ ორი ადამიანი, თუმცა მათ მსუბუქი დაზიანებები აღენიშნებოდათ.
რამდენი ადამიანი დაშავდა საახალწლო პიროტექნიკით წელს საქართველოში, უცნობია. საგანგებო სიტუაციების კოორდინაციისა და გადაუდებელი დახმარების ცენტრში გვითხრეს, რომ ბათუმსა და მთელს საქართველოში პიროტექნიკით დაშავებულთა რაოდენობის შესახებ ინფორმაციას გამოთხოვის შემდეგ მოგვაწვდიან.
საახალწლო პიროტექნიკის გამოყენების შედეგად ყოველწლიურად არაერთი ადამიანი ზიანდება.
2022 წელს საქართველოში 5 მილიონ 816 ათას 200 აშშ დოლარის ღირებულების პიროტექნიკა შემოიტანეს. აქედან 3 მილიონ 99 ათას 900 აშშ დოლარის მარტო ფეიერვერკია.
ამავე თემაზე:
