უკრაინელმა სამართალდამცავებმა ნიკოლაევის ოლქში რუსული საოკუპაციო ჯარების მიერ მოწყობილი წამების კამერა იპოვეს. ამის შესახებ უკრაინის გენერალური პროკურატურა ავრცელებს ინფორმაციას.
გამოძიების მონაცემებით, რუსეთის წარმომადგენლებმა სოფელ ალექსანდროვკაში ადგილობრივ მცხოვრებს სახლი წაართვეს და აქ უკანონოდ აკავებდნენ, სცემდნენ და აწამებდნენ ადგილობრივებს, რომლებმაც უარი თქვეს მათთან თანამშრომლობაზე.
უკრაინული სპეცსამსახურების ცნობით, დატყვევებულებს აწამებდნენ პლასტიკური პაკეტით – მოხრჩობით, სცემდნენ მძიმე საგნებით და იყენებდნენ ელექტროშოკს.
სამართალდამცავებმა ადგილის დათვალიერებისას საწამებლად გამოყენებული „ინსტრუმენტებიც“ აღმოაჩინეს. მათ ასევე დაადგინეს უკრაინის მოქალაქეების ვინაობა, რომლებსაც ოკუპანტები უკანონოდ აკავებდნენ და აწამებდნენ ერთი თვის განმავლობაში.
უკრაინის პროკურატურამ საქმე აღძრა ომის კანონებისა და წეს-ჩვეულებების დარღვევის მუხლით, რაც ითვალისწინებს თავისუფლების აღკვეთას 8-დან 12 წლამდე ვადით.
