2 იანვრის ღამეს რუსეთის შეიარაღებულმა ძალებმა დრონებით შეუტიეს კიევს. უკრაინული მედიის ცნობით, საჰაერო განგაში უკრაინის დედაქალაქში 1 იანვრის 23:38 საათიდან 03:46 საათამდე გაგრძელდა.
უკრაინის საჰაერო თავდაცვის ძალების ცნობით, 2 იანვრის ღამეს კიევისკენ 40 კამიკაძე დრონი მიემართებოდა. მათგან 15 უკრაინელებმა მეზობელ რეგიონებში გაანადგურეს, 3 – კიევის რეგიონში და 22 – უშუალოდ დედაქალაქის თავზე – ამის შესახებ კიევის მერმა ვიტალი კლიჩკომ განაცხადა.
უკვე მესამე დღეა რუსეთის არმიას საჰაერო იერიში მიაქვს უკრაინის დედაქალაქზე დრონებით. თავდასხმის სერია 31 დეკემბერს დაიწყო. დრონებით თავდასხმა გაგრძელდა პირველ იანვარსაც.
განახლებული ინფორმაცია: უკრაინის შეიარაღებული ძალების გენერალური შტაბის ცნობით, ბოლო 24 საათის განმავლობაში რუსეთის საოკუპაციო ჯარებმა უკრაინაზე 51 საჰაერო დარტყმა განახორციელეს, მათ შორის 44 „შაჰედი“ იყო, ყველა მათგანი უკრაინის თავდაცვამ ჩამოაგდო.
___________
ჩაბნელებული კიევი. ფოტო: EPA-EFE/OLEG PETRASYUK