გარემოსდაცვითი ზედამხედველობის დეპარტამენტის ინფორმაციით, თბილისში გამოვლინდა წიწვოვანი ხე-მცენარეების უკანონო მოპოვება-რეალიზაციის ფაქტი.
„მოქალაქეები, სპორტის სასახლის მიმდებარე ტერიტორიაზე, უკანონოდ მოპოვებული 80 ერთეულამდე ნაძვის სახეობის ხე-მცენარეს უკანონოდ ჰყიდნენ. წიწვოვანი ხე-მცენარეები დაილუქა და შედგა შესაბამისი აქტები“- წერს ზედამხედველობა.
წიწვოვნების უკანონო მოპოვებაზე, ასევე ტრანსპორტირებისა და რეალიზაციის წესის დარღვევაზე, გათვალისწინებულია ჯარიმა 200-დან 2000-ლარამდე, რასაც ემატება გარემოსთვის მიყენებული ზიანის ოდენობაც.
მათივე ინფორმაციით, პრევენციული ღონისძიებები ტარდება სახელმწიფო ტყის ფონდის მიმდებარე ტერიტორიებსა და მისასვლელ გზებზე, ქალაქის შემოსასვლელთან, დასახლებულ პუნქტებში, ასევე საავტომობილო გზებზე.
გარემოსდაცვითი ზედამხედველობის დეპარტამენტი მოუწოდებს მოსახლეობას წინასაახალწლოდ, წიწვოვანი ხე-მცენარეები მოიპოვონ მხოლოდ კანონის ფარგლებში – სანერგეებში, პლანტაციებში, საკარმიდამო ნაკვეთებში ან შეიძინონ იმპორტირებული ნაძვები.
_____________________
მთავარი ფოტო: „ბათუმელების“ არქივიდან
