უკრაინის შეიარაღებული ძალების მთავარსარდლის, ვალერი ზალუჟნის ცნობით, დღეს, პარასკევს, რუსეთმა უკრაინის მიმართულებით 76 რაკეტა გაუშვა, მათ შორის 72 იყო ფრთოსანი რაკეტა (X-101, „კალიბრ“, X-22). გენერლის ინფორმაციით, უკრაინის საჰაერო საზენიტო ჯარებმა და სახმელეთო ჯარების საჰაერო თავდაცვის ძალებმა 60 რაკეტა ჩამოაგდეს.
ზალუჟნის მიერ გავრცელებული ინფორმაციით, რაკეტებს მიწიდან, ციდან, ზღვიდან ისროდნენ მნიშვნელოვანი ინფრასტრუქტურისკენ.
ზალუჟნის შეფასებით, სარაკეტო ტერორის მიზანია კიევის საჰაერო თავდაცვის გარღვევა და უკრაინელების იძულება – დაყარონ იარაღი.
„ტრადიციულად, ისვრიან Ту-95 თვითმფრინავებიდან Kh-555 და Kh-101ტიპის რაკეტებს. შავი ზღვიდან „კალიბრებს“ ისვრიან, S-300 ტიპის რაკეტებს. იყენებენ ასევე Ту 22 М3 ბომბდამშენებს, რითაც Х-22 ტიპის რაკეტებს უშვებენ.
Су-35 ტიპის თვითმფრინავებიც გამოიყენეს Х-59 ტიპის რაკეტების სასროლად“, – ამბობს საჰაერო ძალების წარმომადგენელი იური იგნატი.
იური იგნატმა ხაზგასმით აღნიშნა, რომ რუსეთმა პირველად გამოიყენა ენგელსის აეროდრომის სტრატეგიული ბომბდამშენები. მისივე თქმით, სარაკეტო დარტყმები დაფიქსირდა ასევე კასპიის ზღვის ჩრდილოეთიდან.
ინფორმაციას უკრაინული მედია და გამოცემა BBC-იც ავრცელებს, თუმცა ეს უკანასკნელი აღნიშნავს, რომ ომის დროს სააგენტო ვერ ახერხებს მეომარი მხარეების ბრალდებების სასწრაფოდ გადამოწმებას.
