სამი საბავშვო ბაღის მშენებლობისა და ერთი საცხოვრებელი სახლის გამაგრების სამუშაოებს ბათუმის მერია ერთობლივად ყიდულობს. შესყიდვის ბიუჯეტი 6 მილიონ 176 624 ლარია.
სამი ბაღის მშენებლობას გეგმავდა მერია 2022 წელსაც, თუმცა სამივე შემთხვევაში მიმწოდებელ კომპანიებთან ხელშეკრულებები შეწყვიტეს. მხოლოდ 27 პროცენტით შესრულდა ბათუმში, ქათამაძის ქ. №38-ში საბავშვო ბაღის მშენებლობის პროექტი. ბიუჯეტში დარჩა მილიონ 508 169 ლარი.
მერიაში განმარტეს, რომ შემსრულებელმა კომპანიამ სამუშაოები ხელშეკრულებით გათვალისწინებული გეგმა-გრაფიკის დარღვევით აწარმოა.
იგივე მიზეზით მშენებელმა ბაგრატიონის #127-ში ბაღის მშენებლობისთვის გათვალისწინებული თანხიდან, მხოლოდ 953 775 ლარის ათვისება შეძლო, ბიუჯეტში დარჩა მილიონ 120 225 ლარი.
ტენდერში გამარჯვებულმა კომპანიამ გეგმა-გრაფიკით ვერ წარმართა დაბა ჩაქვში, ჭავჭავაძის ქ. №7-ის მიმდებარედ საბავშვო ბაღის მშენებლობაც.
ამჯერად ბათუმის მერიის საქალაქო ინფრასტრუქტურისა და კეთილმოწყობის სამმართველო ერთობლივად ყიდულობს ზემოთ ჩამოთვლილი სამი ბაღის მშენებლობისა და ეზოს კეთილმოწყობის სამუშაოებს. გარდა ამისა იგივე ტენდერი ხინიკაძის ქ.№7-ში მდებარე საცხოვრებელი სახლის აღდგენა-გამაგრებასაც ითვალისწინებს.
ტენდერით გათვალისწინებული ერთ-ერთი მოთხოვნის მიხედვით მიმწოდებელმა სამუშაოები ყველა ობიექტზე ერთდროულად უნდა დაიწყოს.
სამშენებლო სამუშაოების განხორციელების ვადა კი 2023 წლის 30 აგვისტოს ჩათვლით პერიოდია. საქალაქო ინფრასტრუქტურისა და კეთილმოწყობის სამმართველომ ტენდერი 2022 წლის 9 დეკემბერს გამოაცხადა, წინადადებების მიღების საბოლოო ვადა 2023 წლის 3 იანვარია.
მთავარი ფოტო: ერთ-ერთი ბაღის პროექტის რენდერი