ნეტგაზეთი • RU

სიმტკიცის განსახიერება – ზელენსკი Financial Times-მა წლის ადამიანად დაასახელა

ბრიტანულმა გამოცემა Financial Times-მა წლის ადამიანის ტიტული უკრაინის პრეზიდენტს მიაკუთვნა.

„თებერვლის სამხედრო აგრესიამდე უკრაინელთა ნაწილი მას დილეტანტად აღიქვამდა, ადამიანად, რომელიც ცდილობდა თავისი მაღალი თანამდებობის მოთხოვნებისთვის როგორმე ეპასუხა.

44 წლის ზელენსკიმ ისტორიაში ადგილი დაიმსახურა ლიდერობის თავისი არაჩვეულებრივი უნარით და სულის სიძლიერით…

ზელენსკი იქცა უკრაინელი ხალხის სიმამაცისა და სიმტკიცის განსახიერებად რუსეთის აგრესიასთან ბრძოლაში. სწორედ ამ მიზეზების გამო შეარჩია Financial Times-მა ზელენსკი წლის ადამიანად“, – წერს გამოცემა.

Financial Times-ი დასძენს, რომ ზელენსკის თავისი ემოციური და შინაარსიანი გამოსვლების გამო ხშირად ბრიტანეთის ცნობილ პრემიერს, უინსტონ ჩერჩილს ადარებენ.

უკრაინის პრეზიდენტი სოციალურ მედიასაც დაუღალავად იყენებს „აგიტაციისთვის დასავლეთის სამხედრო და ფინანსური დახმარების მისაღებად და საკუთარი ხალხის მძიმე მდგომარეობას გავლენის მორალურ ბერკეტად აქცევს,“ – მიუთითებს გამოცემა. – „ამ გზაზე ის ავტორიტარიზმთან გლობალურ  ბრძოლაში ლიბერალური დემოკრატიის მედროშე გახდა.“

გაზაფხულზე ვოლოდიმირ ზელენსკი ჟურნალმა TIME-მა წლის 100 გავლენიან ლიდერს შორის პირველ ადგილზე დაასახელა.

წაიკითხეთ ზელენსკის მიმართვა მსოფლიოს გავლენიანი ლიდერებისადმი.

ჟურნალ TIME-ის სიაში შევიდა უკრაინული გამოცემა „უკრაინსკა პრავდას“ რედაქტორი, ჟურნალისტი სევგილ მუსაიევაც.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.