დიდი ბრიტანეთის დაზვერვის შეფასებით, ბახმუტის დაკავებამ მოსკოვისთვის უკვე არა ოპერატიული, არამედ პოლიტიკური მნიშვნელობა შეიძინა.
უწყების ცნობით, თავისი საბრძოლო ძალისხმევისა და ცეცხლის დიდ ნაწილს რუსეთი კვლავაც ბახმუტის გარშემო ფრონტის 15-კილომეტრიანი მონაკვეთისკენ მიმართავს.
„ბოლო დღეებში, რუსეთის არმიამ, სავარაუდოდ, მცირედით წაიწია წინ ამ მიმართულებაზე და ახლა ცდილობს მდინარე ბახმუტკის გარშემო ჭაობიან ადგილას გამაგრდეს,“ – წერს დაზვერვა 3 დეკემბრის რელიზში.
უწყების ვარაუდით, რუსეთის ძალები ქალაქის ალყაში მოქცევას ჩრდილოეთიდან და სამხრეთიდან ცდილობენ.
„2022 წლის აგვისტოს შემდეგ რუსეთმა ბახმუტი თავისი მთავარი შეტევითი ოპერაციების პრიორიტეტად აქცია. ქალაქის დაკავებას მცირე ოპერატიული ღირებულება ექნება, თუმცა პოტენციურად საშუალებას მისცემს რუსეთს, დაემუქროს უფრო მსხვილ საქალაქო რაიონებს – კრამატორსკსა და სლავიანსკს.
მიუხედავად ამისა, ბახმუტის შეტევის კამპანია არაპროპორციულად ძვირადღირებულია შესაძლო სარგებელთან შედარებით. სავარაუდოდ, ბახმუტის აღება რუსეთისთვის სიმბოლურ პოლიტიკურ ამოცანად იქცა,“ – ასკვნის უწყება.
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში უწყება აღნიშნავდა, რომ საბრძოლო მასალების დეფიციტი, რასაც ლოგისტიკური პრობლემებიც ამძაფრებს, სერიოზულად ზღუდავს რუსეთის არმიის პოტენციალს, განაახლოს ეფექტიანი მსხვილმასშტაბიანი შეტევები.
