ნეტგაზეთი • RU

საბრძოლო მასალების დეფიციტის გამო რუსეთს შეტევების წარმოება უჭირს – ბრიტანეთის დაზვერვა

დიდი ბრიტანეთის დაზვერვის ცნობით, რუსეთმა ხერსონის ოლქში არსებული ლოგისტიკური კვანძები, მათ შორის სარკინიგზო გადაცემის პუნქტები, უფრო შორს, სამხრეთისა და აღმოსავლეთისკენ გადაიტანა.

„გასულ თვეში დნეპრის აღმოსავლეთ სანაპიროდან რუსეთის ჯარების გასვლამ უკრაინის არმიას შესაძლებლობა მისცა, დაარტყას რუსეთის დამატებით ლოგისტიკურ და საკომუნიკაციო კვანძებს,“ – ამ გარემოებით ხსნის უწყება რუსეთის ქმედებას, თუმცა დასძენს, რომ მიღებული ზომების მიუხედავად, რუსეთის არმიის მომარაგების ქსელები კვლავაც უკრაინული არტილერიის წვდომის არეალში რჩება.

„რუსეთის ლოგისტიკურ დანაყოფებს აუცილებლად დასჭირდებათ რკინიგზიდან ტვირთების საავტომობილო ტრანსპორტით გადატანა, რადგან მათ არმიის მოწინავე თავდაცვითი პოზიციები უნდა მოამარაგონ. ამის გამო, ისინი კვლავაც დაუცველები აღმოჩნდებიან უკრაინული არტილერიის პირისპირ.“

ბრიტანეთის დაზვერვის შეფასებით, საბრძოლო მასალების დეფიციტი (ამას ლოგისტიკური პრობლემებიც ამძაფრებს) სერიოზულად ზღუდავს რუსეთის არმიის პოტენციალს, განაახლოს ეფექტიანი მსხვილმასშტაბიანი შეტევები.

გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში უწყება წერდა, რომ უკრაინაში რუსეთის ფართომასშტაბიანი სარაკეტო კამპანიის ეფექტიანობა იკლებს, რადგან მოსკოვმა თითქმის ამოწურა შესაბამისი რაკეტების მარაგი.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.