ნეტგაზეთი • RU

რუსეთის საერთო დანაკარგი ომში 200 ათასი სამხედროა – პოდოლიაკი

უკრაინის პრეზიდენტის მრჩევლის, მიხაილო პოდოლიაკის განცხადებით, რუსეთის დანაკარგი უკრაინასთან ომში დაახლოებით 200 ათასი სამხედროა.

„ჩვენი მონაცემებით, რომლებსაც გენშტაბი და სამხედრო დაზვერვა გვაძლევს, დღეისთვის დაახლოებით 90 ათასი რუსი სამხედროა დაღუპული. ეს რიცხვი ცხადია, დამრგვალებულია. გამოუსწორებელი დანაკარგებია ასევე დაჭრილები, ამპუტირებულები, მძიმედ დაავადებულები, ტყვეები, უგზო-უკვლოდ დაკარგულები – ეს რიცხვი 200 ათასს უახლოვდება,“ – ამბობს პოდოლიაკი.

მისი თქმით, რუსეთი მობილიზაციით სწორედ ამ დანაკარგის შევსებას ცდილობს.

„ჩვენ არანაირ დამატებით მობილიზაციას არ ვაცხადებთ, რადგან ჩვენი დანაკარგების კომპენსირების საჭიროება არ დგას,“ – დასძენს პრეზიდენტის მრჩეველი.

გუშინ ევროკომისიის პრეზიდენტმა ურსულა ფონ დერ ლაიენმა განაცხადა, რომ უკრაინაში ომის განმავლობაში 20 ათასზე მეტი მშვიდობიანი მოქალაქე და 100 ათასი სამხედრო დაიღუპა. მოგვიანებით, მისი გამოსვლიდან ეს ფრაზა ამოიღეს, ევროკომისიის პრესსპიკერის მოადგილემ კი განმარტა, რომ გაიპარა უზუსტობა და რიცხვი 100 ათასი გულისხმობდა როგორც დაღუპულებს, ისე დაჭრილებს.

ურსულა ფონ დერ ლაიენის პირველი განცხადების შემდეგ, უკრაინის ხელისუფლებამ ეს რიცხვი უარყო, გენშტაბმა მედიას უთხრა, რომ უკრაინის სამხედრო დანაკარგების შესახებ ინფორმაცია არ საჯაროვდება, უკრაინის პრეზიდენტის ოფისში კი განმარტეს, რომ ამაზე საუბარი მხოლოდ უმაღლეს მთავარსარდალს შეუძლია.

11 ნოემბერს უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთის დანაკარგები უკრაინისას 10-ჯერ აღემატება.

უკრაინის გენშტაბის დღევანდელი მონაცემებით, რუსეთმა უკრაინასთან ომში უკვე 89 440 სამხედრო დაკარგა.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.