მთავარი,სიახლეები

რუსეთი სავარაუდოდ მორიგი მასშტაბური სარაკეტო დაბომბვისთვის ემზადება – Der Spiegel

01.12.2022 • 1022
რუსეთი სავარაუდოდ მორიგი მასშტაბური სარაკეტო დაბომბვისთვის ემზადება – Der Spiegel

უკრაინაზე მორიგი მასშტაბური სარაკეტო თავდასხმისთვის მზადებას გერმანული Der Spiegel-ის ცნობით, სარატოვის რუსული აეროდრომის სატელიტური ფოტოები ადასტურებს.

ფოტოებზე დაახლოებით ორი ათეული გამანადგურებელი Ту-95 და Т-160 ჩანს.

„აქტივობა ბაზაზე ძალიან მაღალია,“ – ამბობს გამოცემასთან სამხედრო ანალიტიკოსი არდა მევლუთოღლუ.

მისი თქმით, კადრებზე ასევე ჩანს ცისტერნები საწვავით, ყუთები საბრძოლო მასალებით, სატრანსპორტო საშუალებები და სარემონტო მასალები. გარდა ამისა, „ბევრი სატვირთო თვითმფრინავი, რაც ადასტურებს, რომ აეროდრომზე ახლახან დიდი მოცულობის ტვირთი მიიტანეს, სავარაუდოდ, ფრთოსანი რაკეტები“.

პოლონური ანალიტიკური ცენტრის, Rochan Consulting-ის ხელმძღვანელი კონრად მუზიკაც ადასტურებს, რომ აეროდრომზე საბრძოლო აქტივობა მკვეთად გაზრდილია.

„ბევრი მოძრაობაა, ემსახურებიან თვითმფრინავებს და აშკარაა, რომ ემზადებიან ახალი ოპერაციისთვის. გარდა ამისა, შეინიშნება ისეთი ტექნიკა, რომელიც  Х-55 და Х-101 ტიპის ფრთოსანი რაკეტების გადასატანად გამოიყენება,“ – აღნიშნავს ის.

ანალიტიკოსების აზრით, აეროდრომი „ენგელს 2“ რუსეთის საავიაციო ძალების ერთ-ერთი უმნიშვნელოვანესი ბაზაა, რადგან სწორედ იქაა განლაგებული სტრატეგიული გამანადგურებლების ორი პოლკი, რომელიც რუსეთის საჰაერო ბირთვული შეკავების ტაქტიკის ნაწილია.

თებერვალში, როდესაც ომის დასაწყებად ემზადებოდა, რუსეთმა ამ აეროდრომზე დამატებითი გამანადგურებლები განალაგა და მას შემდეგ ბაზას უკრაინაზე მასშტაბური საჰაერო დარტყმებისთვის იყენებს.

რამდენიმე დღის წინ უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთის ახალი შეტევისთვის ემზადება.

ახალი სარაკეტო თავდასხმისთვის მზადებაზე წერდა ომის კვლევის ამერიკული ინსტიტუტიც (ISW).

უკრაინის თავდაცვის მინისტრის ოლექსი რეზნიკოვის ცნობით, რუსეთმა ბოლო ათ თვეში 16 ათასი სარაკეტო დარტყმა განახორციელა უკრაინის ტერიტორიაზე. სამიზნეების 97% სამოქალაქო ობიექტი იყო.

უკრაინის უსაფრთხოებისა და თავდაცვის ეროვნული საბჭოს მდივნის, ოლექსი დანილოვის თქმით, რუსეთს რაკეტების მარაგი კიდევ სამი-ოთხი მასშტაბური შეტევისთვის ეყოფა.

დიდი ბრიტანეთის დაზვერვის შეფასებით, უკრაინაში რუსეთის ფართომასშტაბიანი სარაკეტო კამპანიის ეფექტიანობა იკლებს, რადგან მოსკოვმა შესაბამისი რაკეტების არსენალი თითქმის ამოწურა.

მთავარი ფოტოზე: სარატოვის აეროდრომის სატელიტური ფოტო/Maxar Technologies

გადაბეჭდვის წესი


ასევე: